భద్రాచలం, జూన్ 10 : ఐదు నెలలుగా పెండింగ్లో ఉన్న వేతనాలు చెల్లించాలని డిమాండ్ చేస్తూ భద్రాద్రి కొత్తగూడెం జిల్లా భద్రాచలం ప్రభుత్వ ఏరియా దవాఖాన ఎదుట సోమవారం ఔట్ సోర్సింగ్ కార్మికులు ధర్నా చేపట్టారు. కార్మికుల ఆందోళనతో శానిటేషన్ పనులు నిలిచిపోయాయి. దీంతో స్పందించిన ఐటీడీఏ పీవో ప్రతీక్ జైన్ కార్మికులకు తక్షణమే ఒక నెల వేతనం మంజూరు చేశారు.
ఈ సందర్భంగా సీఐటీయూ జిల్లా కార్యదర్శి ఏజే రమేశ్ మాట్లాడుతూ.. బాధ్యతారహితంగా వ్యవహరిస్తున్న కాంట్రాక్టర్ను బ్లాక్ లిస్ట్లో పెట్టి.. అతడి కాంట్రాక్టును రద్దు చేయాలని డిమాండ్ చేశారు. కార్మికుల ఆందోళన విషయం తెలుసుకున్న ఎమ్మెల్యే తెల్లం వెంకట్రావు అక్కడికి చేరుకొని మిగతా పెండింగ్ వేతనాలను పది రోజుల్లో చెల్లించేందుకు కృషి చేస్తామని హామీ ఇచ్చారు. దీంతో కార్మికులు ఆందోళన విరమించారు. పది రోజుల్లో సమస్యను పరిష్కరించకపోతే తిరిగి సమ్మె కొనసాగిస్తామని సీఐటీయూ నాయకులు హెచ్చరించారు.