Vemulawada | వేములవాడ : చేదబావిలో పడ్డ సెల్ఫోన్ తీసుకునేందుకు బావిలోకి దిగిన ఓ మహిళ.. పైకి ఎక్కుతుండగా మధ్యలో తాడు తెగి బావిలో పడిపోయింది. ఈ ఘటన రాజన్న సిరిసిల్ల జిల్లా వేములవాడలో ఆదివారం జరిగింది. బద్దిపోచమ్మ వీధిలోని ఓ ఇంట్లో అద్దెకు ఉంటున్న కూర రాజమణి సెల్ఫోన్ ఆదివారం చేదబావిలో పడిపోయింది.
బావిలో నీళ్లు లేకపోవడంతో ఆమె చేపలు పట్టే వలను తాడుగా మలుచుకొని బావిలోకి దిగింది. ఫోన్ తీసుకుని పైకి వస్తుండగా తాడు తెగి ఆమె బావిలో పడింది. స్థానికుల సమాచారంతో పోలీసులు, అగ్నిమాపక సిబ్బంది అక్కడికి చేరుకొని ఆమెను బయటకు తీశారు. రెండు కాళ్లకు తీవ్రగాయాలు కావడంతో 108 వాహనంలో ఏరియా దవాఖానకు తరలించారు. పోలీసులు, అగ్నిమాపక సిబ్బందికి స్థానికులు కృతజ్ఞతలు తెలిపారు.