Telangana | జనగామ : తెలంగాణలోని అన్నదాతలను కాంగ్రెస్ సర్కార్ పట్టించుకోవడం లేదు. కొనుగోలు కేంద్రాల్లో వడ్లను కొనేందుకు ప్రభుత్వం ముందుకు రావడం లేదు. దీంతో కొనుగోలు కేంద్రాల్లో ఉంచిన ధాన్యం అకాల వర్షాలకు తడిసి పాడైపోతోంది. వడ్లను కొనుగోలు చేసి రైతులకు మేలు చేయాలని అన్నదాతలు ప్రభుత్వానికి మొర పెట్టుకుంటున్నారు.
జనగామ మార్కెట్ను గత 15 రోజులుగా తెరవలేదంటూ రైతులు ఆవేదన వ్యక్తం చేస్తున్నారు. వడ్లను కొనుగోలు చేసేందుకు ఎవరూ ముందుకు రావడం లేదని రైతులు పేర్కొన్నారు. ఈ క్రమంలో పలు సంఘాలు రైతులకు మద్దతుగా ధర్నా నిర్వహించాయి. దీంతో జనగామ మార్కెట్ వద్దకు పోలీసులు చేరుకున్నారు. ఈ సందర్భంగా ఓ మహిళా రైతు వడ్లు కొనాలని కోరుతూ.. పోలీసుల కాళ్లు మొక్కింది. ఇక క్వింటాల్కు రూ. 500 బోనస్ ఇవ్వాలని రైతులు, నాయకులు డిమాండ్ చేశారు. మహిళా రైతు పోలీసుల కాళ్లు మొక్కిన దృశ్యాలు సోషల్ మీడియాలో వైరల్ అవుతున్నాయి.