కంది/బాసర, ఆగస్టు 8: సంగారెడ్డి జిల్లా కంది మండల పరిధిలోని ఐఐటీ హైదరాబాద్లో ఓ విద్యార్థిని సోమవారం రాత్రి ఫ్యాన్కు ఉరేసుకుని ప్రాణాలు తీసుకున్నది. ఒడిశా రాష్ట్రం బర్మాహరాజర్ జిల్లా, సొన్పుర్డుంగిరి గ్రామానికి చెందిన మమిత నాయక్ (22) 15 రోజుల క్రితం ఐఐటీహెచ్లో బీటెక్ మొదటి సంవత్సరంలో చేరింది. సోమవారం రాత్రి చదువుకుంటానని గదిలోకి వెళ్లి తన చున్నీతో ఫ్యాన్కు ఉరేసుకున్నది. క్యాంపస్ ఇన్చార్జి మోహన్కుమార్ ఇచ్చిన సమాచారంతో సీఐ సుధీర్కుమార్, ఎస్సై రాజేష్నాయక్ సంఘటనా స్థలానికి చేరుకుని క్లూస్ టీం ద్వారా పంచనామా నిర్వహించారు.
మంగళవారం ఉదయం సంగారెడ్డి ప్రభుత్వ దవాఖానలో పోస్టుమార్టం నిర్వహించి మృతదేహాన్ని కుటుంబసభ్యులకు అప్పగించారు. విద్యార్థిని మమిత గదిలో సూసైడ్ నోట్ లభ్యమైందని, ఒడిషా, ఇంగ్లీష్ భాషల్లో సూసైడ్ నోట్ రాసి ఉందని, అందులో తాను డిప్రెషన్తో ఆత్మహత్యకు పాల్పడుతున్నట్టు రాసి ఉందని సీఐ సుధీర్కుమార్ మీడియాకు వెల్లడించారు. కాగా.. మమిత నాయక్ చదువు ఒత్తిడితో ఆత్మహత్య చేసుకునేంత పిరికిది కాదని కుటుంబసభ్యులు ఆరోపిస్తున్నారు. ఆమె ఆత్మహత్యపై పూర్తి విచారణ జరిపించి న్యాయం చేయాలని వారు కోరారు.
బాసర ట్రిపుల్ ఐటీలో
బాసర ట్రిపుల్ఐటీలో పీయూసీ-1 చదువుతున్న జాదవ్ బబ్లూ మంగళవారం హాస్టల్ గదిలో ఉరేసుకొని ఆత్మహత్య చేసుకున్నాడు. సంగారెడ్డి జిల్లా నారాయణఖేడ్కు చెందిన జాదవ్ బబ్లూ వారం క్రితం బాసర ట్రిపుల్ ఐటీలో ప్రవేశం పొందాడు. అతడి సోదరుడు కూడా ట్రిపుల్ ఐటీలోనే చదువుతున్నాడు. మధ్యాహ్నం తన సోదరుడితో మాట్లాడాడు. అనంతరం హాస్టల్ గదిలో ఎవరూ లేని సమయంలో ఉరేసుకొని ఆత్మహత్య చేసుకున్నాడని ట్రిపుల్ఐటీ అధికారులు తెలిపారు. మృతదేహాన్ని నిర్మల్ దవాఖానకు తరలించారు.