రాజన్న సిరిసిల్ల, జూలై 26 (నమస్తే తెలంగాణ): రాష్ట్ర ప్రభుత్వ నిర్లక్ష్యంతోనే సిరిసిల్ల వస్త్ర పరిశ్రమ సంక్షోభంలో కూరుకుపోయిందని తెలంగాణ పవర్లూం వర్కర్స్ యూనియన్ రాష్ట్ర అధ్యక్షుడు మూషం రమేశ్ ఆరోపించారు. ప్రభుత్వ మొండి వైఖరికి నిరసనగా శనివారం చలో హైదరాబాద్ పేరిట ఇందిరాపార్క్ వద్ద భారీ ధర్నా నిర్వహిస్తున్నట్టు చెప్పారు. కార్మికులు పెద్దసంఖ్యలో తరలివచ్చి ధర్నాను విజయవంతం చేయాలని పిలుపునిచ్చారు. కాగా రాజన్న సిరిసిల్ల జిల్లా కేంద్రం అంబేద్కర్ చౌరస్తాలో కొనసాగుతున్న నేతన్నల రిలే దీక్షలు శుక్రవారానికి ఐదు రోజుకు చేరుకున్నది.
మూషం రమేశ్ దీక్షా శిబిరాన్ని సందర్శించి సంఘీభావం ప్రకటించారు. అనంతరం ఆయన మాట్లాడుతూ.. కాంగ్రెస్ సర్కార్ బతుకమ్మ చీరలు, యూనిఫారాలు, పండుగ దుస్తుల ఆర్డర్లు నిలిపివేసి, మరమగ్గాలకు ఇచ్చే రాయితీని ఎత్తేసి కార్మికుల కడుపుకొట్టిందని మండిపడ్డారు. కాంగ్రెస్ అధికారంలోకి రాగానే చేనేతలకు మళ్లీ పాతరోజులు వచ్చాయని, సిరిసిల్ల కాస్త ఉరిసిల్లగా మారిందని ఆవేదన వ్యక్తంచేశారు. ఇప్పటికైనా ప్రభుత్వం బీఆర్ఎస్ సర్కారు అమలు చేసిన పథకాలను కొనసాగించాలని డిమాండ్ చేశారు.