మద్దిరాల, మార్చి 7: పొట్టదశలో ఉన్న పంటకు నీళ్లు పెట్టి కాపాడుకునేందుకు అర్ధరాత్రి బావి వద్దకు వెళ్లిన ఓ రైతు పాముకాటుతో ప్రాణాలు కోల్పోయాడు. సూర్యాపేట జిల్లా మద్దిరాల మండలం చిననెమిలకు చెందిన రావుల లింగయ్య (56) తనకున్న రెండెకరాల్లో వరి వేశాడు. ప్రభుత్వం వారబందీ ద్వారా ఇస్తున్న కాళేశ్వరం నీళ్లు మొదటి భూములకే సరిపోతున్నది. చివరి ఆయకైట్టెన చిననెమిలలోని పంటలకు ఈ వారం నీళ్లు రాలేదు. కాళేశ్వరం నీళ్లు రాక, తన బావిలో నీళ్లు ఊరకపోవడంతో పొట్టదశలో ఉన్న పంటను కాపాడుకోవాలని లింగయ్య నిర్ణయించుకున్నాడు.
రాత్రి 11.30 గంటలకు త్రీఫేజ్ కరెంట్ వస్తుండడంతో బుధవారం రాత్రి పొలానికి వెళ్లిన లింగయ్య పాముకు కాటుకు గురై అక్కడికక్కడే చనిపోయాడు. గురువారం ఉదయం పొలానికి వెళ్లిన రైతులు అక్కడ అచేతనంగా పడి ఉన్న లింగయ్యను చూసి కుటుంబ సభ్యులకు సమాచారం అందించారు. వెంటనే వారు సూర్యాపేట దవాఖానకు తరలించగా లింగయ్య అప్పటికే మృతి చెందినట్టు నిర్ధారించారు. ఆయన మరణానికి అర్ధరాత్రి కరెంటు ఇవ్వడమే కారణమని, లింగయ్య మృతికి కాంగ్రెస్ ప్రభుత్వమే బాధ్యత వహించాలని కుటుంబ సభ్యులు డిమాండ్ చేస్తున్నారు.