టేకుమట్ల, ఏప్రిల్ 20: పంట ఎండి గుండె పగిలి ఓ రైతు ఆత్మహత్యకు పాల్పడ్డాడు. ఈ ఘటన జయశంకర్ భూపాలపల్లి జిల్లా బూర్నపల్లి గ్రామంలో శనివారం వెలుగుచూసింది. పోలీసుల కథనం ప్రకారం.. టేకుమట్ల మండలం బూర్నపల్లికి చెందిన రైతు కొండ రమేశ్ (44) తనకున్న రెండెకరాల భూమిలో వరి సాగు చేశాడు. అహర్నిశలు కష్టపడి పంటను కాపాడుకునేందుకు ప్రయత్నిస్తున్నాడు. ఇంకో తడి నీళ్లు పారితే పంట చేతికొచ్చేది. కానీ, చివరి దశలో నీరు అందకపోవడంతో మొత్తం ఎండిపోయి తీవ్ర నష్టాన్ని మిగిల్చింది. సుమారు రూ.లక్ష వరకు పెట్టుబడి పెట్టి నష్టపోయిన రైతు రమేశ్ పది రోజులుగా తీవ్ర మనోవేదనకు గురయ్యాడు.
శుక్రవారం చిట్యాల మండలం గిద్దముత్తారంలోని తన చెల్లి ఇంటికి వెళ్లివస్తానని ఇంట్లో చెప్పి బయటికి వెళ్లాడు. తన పొలం సమీపంలోని బూర్నపల్లి గుట్టకు వెళ్లి చెట్టుకు ఉరేసుకొని ఆత్మహత్యకు పాల్పడ్డాడు. శనివా రం ఉదయం కట్టెల కోసం గుట్టకు వెళ్లిన వారికి రమేశ్ మృతదేహం చెట్టుకు వేలాడుతూ కనిపించడంతో కుటుంబ సభ్యులు, గ్రామస్థులకు తెలిపారు. విషయం తెలుసుకున్న పోలీసులు ఘటనా స్థలానికి వెళ్లి పంచనామా నిర్వహించి, పోస్ట్మార్టం నిమిత్తం మృతదేహాన్ని చిట్యాల వైద్యశాలకు తరలించారు. మృతుడి భార్య రజిత ఫిర్యాదు మేరకు కేసు నమోదు చేసి దర్యాప్తు చేస్తున్నట్టు ఎస్సై ప్రసాద్ తెలిపారు.