అశ్వారావుపేట, మే 14: లోక్సభ ఎన్నికల పోలింగ్ రోజున బూత్లో చోటుచేసుకున్న ఘటన విషయంలో బీఆర్ఎస్ కార్యకర్తపై సీఐ దాడి చేశారు. ఈ దాడిని నిరసిస్తూ అశ్వారావుపేట మాజీ ఎమ్మెల్యే తాటి వెంకటేశ్వర్లు నేతృత్వంలో బీఆర్ఎస్, ఆదివాసీ నాయకులు స్థానిక పోలీస్ స్టేషన్ ఎదుట మంగళవారం ధర్నా, రాస్తారోకో నిర్వహించారు. వెంటనే పోలీసులు ఆందోళనకారులతో మాట్లాడి.. విచారణ జరిపి న్యాయం చేస్తామని సీఐ జితేందర్రెడ్డి హామీ ఇవ్వడంతో ఆందోళనను విరమించారు. భద్రాద్రి జిల్లా అశ్వారావుపేట మండ లం అనంతారంలో సోమవారం పోలింగ్ జరుగుతుండగా కాంగ్రెస్ నాయకుడు సూరిబాబు సెల్ఫోన్తో పోలింగ్ కేంద్రంలోకి వెళ్లబోయాడు. దీనిపై బీఆర్ఎస్ కార్యకర్త గీగా నవీన్.. అక్కడే ఉన్న కానిస్టేబుల్కు సమాచారం ఇచ్చాడు. దీంతో కానిస్టేబుల్ స్పందించి సూరిబాబు సెల్ఫోన్ను స్వాధీనం చేసుకోగా.. నవీన్పై సూరిబాబు ఆగ్రహం వ్యక్తం చేస్తూ దుర్భాషలాడాడు.
‘సెల్ఫోన్ పట్టిస్తావా? నీ అంతు చూస్తా?’ అంటూ హెచ్చరించాడు. మంగళవారం ఉదయం పోలీస్స్టేషన్ నుంచి పోలీసులు నవీన్కు ఫోన్ చేసి స్టేషన్కు రావాలంటూ పిలిచారు. దీంతో ఎంపీటీసీ భర్త పద్దం శ్రీనుతో కలిసి నవీన్ పోలీస్ స్టేషన్కు వెళ్లాడు. కొద్దిసేపటికి సీఐ జితేందర్రెడ్డి వచ్చి నవీన్ను కొట్టి స్టేషన్లోనే సాయంత్రం వరకు నిర్బంధించారు. మాజీ ఎమ్మెల్యే తాటి వెంకటేశ్వర్లు స్టేషన్కు వచ్చి ‘నవీన్ను ఎందుకు అదుపులోకి తీసుకున్నారు? ఎవరు ఫిర్యాదు చేశారు?’ అంటూ నిలదీశారు. సమాధానం రాకపోవడంతో బీఆర్ఎస్, ఆదివాసీ నాయకులతో కలిసి పోలీస్ స్టేషన్ ఎదుట ప్రధాన రహదారిపై బైఠాయించారు. ఎస్సై శివరామకృష్ణ వచ్చి ఆందోళనకారులకు నచ్చజెప్పి నిరసనను విరమింపజేశారు.