హైదరాబాద్ సిటీబ్యూరో, జూన్ 14 (నమస్తే తెలంగాణ): మత్తు మాఫియాపై ఉక్కుపాదం మోపుతున్న సైబరాబాద్ పోలీసులు, మూడేండ్లలో స్వాధీనం చేసుకున్న మొత్తం 5006కిలోల (5టన్నుల) గంజాయి, 15రకాల డ్రగ్స్ను సైబరాబాద్ డ్రగ్ డిస్పోజల్ కమిటీ ఆధ్వర్యంలో ధ్వంసం చేశారు. కమిషనరేట్కు చెందిన 30పోలీస్స్టేషన్ల పరిధిలో పెద్దఎత్తున డ్రగ్ మాఫియాపై దాడులు జరిపి 122కేసులు నమోదు చేశారు. ఈ కేసుల్లో పలువురు నిందితులను అరెస్టు చేసి, వారి వద్ద నుంచి 5006.934కిలోల గంజాయి, కొకైన్, హషీష్ ఆయిల్, చరాస్, ఎల్ఎస్డీ, ఎస్టసీ మాత్రలు, ఎస్టసీ పౌడర్, హెరాయిన్, ఓపీఎం, మెథపెటమైన్ వంటి 15రకాల డ్రగ్స్ను సీజ్ చేశారు. పోలీస్కమిషనర్ ఆదేశాలతో డ్రగ్ డిస్పోజల్ కమిటీ చైర్మన్ కొత్తపల్లి నర్సింహ ఆధ్వర్యంలో సైబర్క్రైమ్ ఏసీపీ రవీందర్రెడ్డి, సీసీఆర్బీ ఏసీపీ కలింగరావు, నార్కోటిక్స్ ఇన్స్పెక్టర్ శివప్రసాద్ శుక్రవారం నందిగామ మండలం, ఏదులపల్లిలోని జీజే మల్టీక్లేవ్ ప్రైవేట్ లిమిటెడ్ కంపెనీలో మత్తు పదార్థాలను ధ్వంసం చేశారు.