2018 డిసెంబర్ 12- 2023 డిసెంబర్ 9 మధ్య రుణాలకే ప్రభుత్వంపై 31వేల కోట్ల భారం.. 47 లక్షల మందికి లబ్ధి అందుకు నిధులెట్లా సమీకరిస్తామనేది మా పర్సనల్ ఇష్యూ ఇంకా వివరాలు కావాలంటే భట్టి విక్రమార్కను అడగండి రైతుభరోసాపై సబ్కమిటీ ఏర్పాటు.. జూలై 15లోగా నివేదిక ప్రభుత్వ నిర్ణయాలపై ఇద్దరు మంత్రులు చెప్తేనే అధికారికం మిగతా మంత్రులు వారి వారి శాఖలకే పరిమితం కావాలి క్యాబినెట్ నిర్ణయాలను మీడియాకు వెల్లడించిన సీఎం రేవంత్
Rythu Runa Mafi | హైదరాబాద్, జూన్ 21 (నమస్తే తెలంగాణ): ఎన్నికల మ్యానిఫెస్టోలో ఇచ్చిన హామీ మేరకు రైతులకు ఒకేసారి రూ.2లక్షల రుణమాఫీ చేయాలని నిర్ణయించినట్టు సీఎం రేవంత్రెడ్డి తెలిపారు. సచివాయంలో శుక్రవారం సీఎం అధ్యక్షతన మంత్రిమండలి సమావేశం జరిగింది. ఈ సందర్భంగా తీసుకున్న నిర్ణయాలను సీఎం రేవంత్రెడ్డి మీడియాకు వెల్లడించారు. వరంగల్ రైతు డిక్లరేషన్లో ఇచ్చిన మాట ప్రకారం రైతు రుణమాఫీపై క్యాబినెట్లో చర్చించి నిర్ణయం తీసుకున్నామని చెప్పారు. 2018 డిసెంబర్ 12 నుంచి 2023 డిసెంబర్ 9వ తేదీ మధ్య రైతులు తీసుకున్న రుణాలను రుణమాఫీ చేయాలని నిర్ణయించినట్టు తెలిపారు. ఇందుకు సుమారు రూ.31వేల కోట్లు అవసరమవుతాయని చెప్పారు. ఎనిమిది నెలల్లోనే రైతులకు ఇచ్చిన మాట నిలబెట్టుకుంటున్నామని అన్నారు. దీనిపై త్వరలోనే జీవో జారీచేస్తామని, నియమ నిబంధనలన్నీ పొందుపరుస్తామని తెలిపారు. రోడ్లు, కొండలు, గుట్టలకు, రియల్ ఎస్టేట్ భూములకు, ధనికులకు రైతు భరోసా ఇస్తున్నారనే చర్చ జరుగుతున్నదని పేర్కొన్నారు. ఈ నేపథ్యంలో పారదర్శకంగా పెట్టుబడి సాయం అందించేందుకు మంత్రివర్గ ఉపసంఘాన్ని నియమిస్తున్నట్టు ప్రకటించారు. డిప్యూటీ సీఎం భట్టి విక్రమార అధ్యక్షతన మంత్రులు తుమ్మల నాగేశ్వర్రావు, శ్రీధర్బాబు, పొంగులేటి శ్రీనివాస్రెడ్డి సభ్యలుగా ఉంటారని తెలిపారు. ఈ కమిటీ రైతు సంఘాలు, రాజకీయ పార్టీలు, ఇతర వర్గాలతో చర్చలు జరిపి జూలై 15లోగా ప్రభుత్వానికి నివేదిక అందిస్తుందని చెప్పారు. ఈ నివేదికను శాసనసభలో ప్రవేశపెట్టి అందరి సూచనలతో పారదర్శకంగా అమలు చేస్తామని తెలిపారు.
క్యాబినెట్ నిర్ణయాలు, ప్రభుత్వ పరిపాలనాపరమైన నిర్ణయాలను వెల్లడించే బాధ్యతను మంత్రులు శ్రీధర్బాబు, పొంగులేటి శ్రీనివాస్రెడ్డికి అప్పగించినట్టు సీఎం రేవంత్రెడ్డి తెలిపారు. వారిద్దరు ఇచ్చే సమాచారమే ప్రభుత్వ అధికారిక సమాచారమని స్పష్టం చేశారు. జర్నలిస్టులు ఎలాంటి సందేహాలు ఉన్నా వారిద్దరినే అడగాలని చెప్పారు. మిగతా మంత్రులు తమ శాఖలకు సంబంధించిన సమాచారానికి మాత్రమే పరిమితం కావాలని సూచించారు.
గత పదేండ్లలో కేసీఆర్ నేతృత్వంలోని ప్రభుత్వం రెండుసార్లు రుణమాఫీ చేసిందని సీఎం రేవంత్రెడ్డి తెలిపారు. మొదటిసారి అధికారంలోకి వచ్చినప్పుడు 2014 మార్చి 31వ తేదీని కటాఫ్గా నిర్ణయించి.. రూ.16వేల కోట్ల రుణాలను మాఫీ చేసిందని చెప్పారు. ఆ తర్వాత రెండోసారి అధికారంలోకి వచ్చినప్పుడు 2018 డిసెంబర్ 11వ తేదీని కటాఫ్గా పేర్కొని, రెండోసారి రూ.12వేల కోట్లు రుణమాఫీ చేసిందని వెల్లడించారు. మొత్తంగా కేసీఆర్ ప్రభుత్వం రెండు దఫాల్లో కలిపి రూ.28వేల కోట్ల రుణాలను మాఫీ చేసిందని తెలిపారు.