హైదరాబాద్, జూలై 25 (నమస్తే తెలంగాణ)/న్యూస్నెట్వర్క్: కర్ణాటక, మహారాష్ట్రతోపాటు, తెలంగాణ రాష్ట్రవ్యాప్తంగా విస్తారంగా కురుస్తున్న వర్షాలతో కృష్ణమ్మ ఉప్పొంగి ప్రవహిస్తున్నది. ఆల్మట్టి, నారాయణపూర్, తుంగభద్ర ప్రాజెక్టులు ఇప్పటికే నిండిపోగా, దిగువకు వరదను విడుదల చేస్తున్నారు. దీంతో జూరాలకు, అక్కడి నుంచి శ్రీశైలం ప్రాజెక్టుకు భారీగా వరద వచ్చి చేరుతున్నది. గురువారం సాయంత్రానికి జూరాల ప్రాజెక్టుకు 2.27 లక్షల క్యూసెక్కులు, శ్రీశైలం ప్రాజెక్టుకు 2.50 లక్షల క్యూసెక్కులకు ప్రవాహం వచ్చి చేరుతున్నది.
మరోవైపు తుంగభద్ర నుంచి సైతం దాదాపు 98 వేల క్యూసెక్కుల మేరకు వరద కొనసాగుతున్నది. ఇక గోదావరిలో వరద ప్రవాహం స్థిరంగా కొనసాగుతున్నది. ఎస్సారెస్పీ, ఎల్లంపల్లి ప్రాజెక్టులకు స్వల్పంగా వరద ప్రవాహం పెరిగింది. ఎస్సారెస్పీకి 21,650, నిజాంసాగర్కు 960 క్యూసెక్కుల ఇన్ఫ్లో నమోదైంది. కడెం పూర్తిగా నిండిపోగా 10,536 క్యూసెక్కుల వరద వచ్చి చేరుతున్నది. 18 గేట్లలో రెండు గేట్లు ఎత్తి 13,567 క్యూసెక్కుల నీటిని వదులుతున్నారు. ఎల్లంపల్లి ప్రాజెక్ట్కు 20,998 క్యూసెక్కుల వరద వచ్చి చేరుతున్నది. గురువారం రాత్రి 9 గంటల వరకు లక్ష్మీ బరాజ్ వద్ద 7.71 లక్షల క్యూసెక్కుల వరద వస్తున్నది.