Lok Sabha Elections | హైదరాబాద్, జూన్ 3 (నమస్తే తెలంగాణ): లోక్సభ ఎన్నికల్లో తగ్గిన ఓటింగ్ శాతం ఎవరికి నష్టం? ఎవరికి లాభం చేకూరుస్తుందనే దానిపై రాజకీయ పార్టీలు, అభ్యర్థుల్లో టెన్షన్ నెలకొన్నది. కౌంటింగ్కు సమయం దగ్గరపడుతున్న కొద్దీ అభ్యర్థులు లెక్కల్లో మునిగి తేలుతున్నారు. అసెంబ్లీ ఎన్నికలతో పోలిస్తే లోక్సభ ఎన్నికల్లో దాదాపుగా 16 లక్షల మంది ఓటింగ్కు దూరంగా ఉన్నారు. ఈ తగ్గిన ఓటింగ్ ఎవరికి నష్టం చేస్తుందన్న కోణంలో విశ్లేషిస్తున్నారు. తెలంగాణలో నిరుడు నవంబర్ 30న అసెంబ్లీ ఎన్నికలు జరిగాయి. ఈ ఎన్నికల్లో మొత్తం 2.34 కోట్ల మంది ఓటుహక్కును వినియోగించుకున్నారు. అంటే 71.97 శాతం పోలింగ్ నమోదైంది. మే 13న జరిగిన లోక్సభ ఎన్నికల్లో 2.18 కోట్ల మంది ఓటు వేశారు. అంటే 65.67 శాతం ఓటింగ్ నమోదైంది.
అంటే దాదాపు 16 లక్షలమంది ఓటింగ్కు దూరమయ్యారు. లోక్సభ ఎన్నికల్లో ఒక్క హైదరాబాద్ పరిధిలో మాత్రమే కొంత ఎక్కువ పోలింగ్ జరిగింది. తెలంగాణలో ఎన్నికలు జరిగిన రోజునే పొరుగు రాష్ట్రం ఏపీలోనూ ఎన్నికలు జరగడంతో హైదరాబాద్, పరిసర జిల్లాల నుంచి పెద్ద ఎత్తున తరలివెళ్లారు. ఓటింగ్ శాతం తగ్గడానికి ఇదే కారణమని చెప్తున్నారు. ఈ తగ్గిన ఓట్లు ఎవరికి పడాల్సినవన్న చర్చ ఇప్పుడు జోరుగా సాగుతున్నది. అసెంబ్లీ ఎన్నికల్లో కాంగ్రెస్ అధికారంలోకి రావడానికి వీరే కారణమని, ఈ తగ్గిన ఓట్లు కూడా ఆ పార్టీకి పడాల్సినవేనని, కాబట్టి ఇప్పుడు నష్టం జరిగేది కూడా ఆ పార్టీకేనని విశ్లేషిస్తున్నారు.