హైదరాబాద్, జూన్ 5 (నమస్తే తెలంగాణ): రాష్ట్రంలో ఈ ఏడాది ఎంపీలు, ఎమ్మెల్యేలపై 143 కేసులు నమోదైనట్టు హైకోర్టు రిజిస్ట్రీ వెల్లడించింది. గతంలో 258 కేసులు పెండింగ్లో ఉన్నాయని, వాటిలో 235 కేసుల నిందితులకు సమన్లు జారీ చేశామని వివరించింది. మరో రెండు కేసుల్లో నిందితులను పోలీసులు హాజరుపర్చలేదని బుధవారం హైకోర్టుకు తెలిపింది. దీంతో ఆ నిందితులను ఎందుకు హాజరుపర్చలేదని హైకో ర్టు ప్రధాన న్యాయమూర్తి జస్టిస్ అలోక్ అరాధే, జస్టిస్ టీ వినోద్ కుమార్ ధర్మాసనం పోలీసులపై ఆగ్రహం వ్యక్తం చేసిం ది.
సీబీఐ కోర్టు లో పెండింగ్లో ఉన్న డిశ్చార్జి పిటిషన్ల పరిషారానికి గడువు విధించినప్పటికీ ఫలితం లేకపోయిందని వ్యాఖ్యానించింది. ఏపీ సీఎం వైఎస్ జగన్ ఆదాయానికి మించి ఆస్తులు కూడబెట్టారన్న కేసులో 134కుపైగా డిశ్చార్జి పిటిషన్లపై వాదనలు ముగిసినప్పటికీ తీర్పులు రాకపోవడంపై కూ డా హైకోర్టు ప్రశ్నించింది. ప్రజాప్రతినిధులపై నమోదైన కేసులను త్వరగా పరిష్కరించాలని గతంలో తాము జారీచేసిన ఉత్తర్వుల ప్రతులను అన్ని కోర్టులకు పం పాలని రిజిస్ట్రీని ఆదేశిస్తూ.. విచారణను జూలై మొదటి వారానికి వాయిదా వేసింది.