కోనరావుపేట, జూన్ 17: యూరప్లో ఉపాధి ఆశ చూపి పలువురి నుంచి రూ.10 లక్షలు వసూలు చేసి దుబాయ్కి పరారయ్యాడో ఏజెంట్. బాధితుల వివరాల ప్రకారం.. రాజన్న సిరిసిల్ల జిల్లా నిజామాబాద్ గ్రామానికి చెందిన చెలిమెల (కమ్మరి) తిరుపతి కొన్నేండ్లుగా గల్ఫ్ దేశం వెళ్లి వస్తున్నాడు.
నిరుడు ధర్మారం గ్రామానికి చెందిన తాళ్లపల్లి రాజు, ఊరడి రాములు, వెంగళి నవీన్, వెంగళి దేవయ్య, కొలనూర్కు చెందిన బత్తిని రమేశ్, నిజామాబాద్ గ్రామానికి చెందిన పిట్టల రవి, ఊరడి మధుతోపాటు మరికొందరిని యూరప్లోని కంపెనీల్లో ఆఫీస్ బాయ్గా పని కల్పిస్తానని నమ్మించాడు. తన బంధువు నారపల్లి సుధాకర్ ద్వారా వీరిని కలిసిన తిరుపతి వీసాలు పంపిస్తా.. డబ్బులు సిద్ధం చేసుకోవాలని సూచించాడు.
నమ్మిన బాధితులు భూములు అమ్మి, బంగారు ఆభరణాలు తాకట్టు పెట్టి, అప్పులు చేసి రూ.10 లక్షల నగదును సుధాకర్ ద్వారా తిరుపతికి అప్పజెప్పారు. ఆ తర్వాత హైదరాబాద్, బెంగళూర్లో గ్లోబల్ ఎంబసీలో ఇంటర్వ్యూలు అంటూ మరో రూ.20 వేల చొప్పున వసూలు చేశాడు. మోసపోయామని గుర్తించిన బాధితులు ఏజెంట్ను నిలదీశారు.
మూడు నెలల్లో వీసాలు పంపకపోతే డబ్బులు తిరిగి చెల్లిస్తానని బాండ్ పేపర్ రాసిచ్చాడు. ఈ నెల 15తో గడువు ముగియడంతో బాధితులు సోమవారం ఏజెంట్ ఇంటికి వెళ్లి ఆరా తీశారు. తన భర్త దుబాయ్ వెళ్లాడని, డబ్బుల గురించి తనకేం తెలియదని ఆమె చెప్పడంతో బాధితులు షాక్ అయ్యారు. ఏజెంట్ ఇంట్లో కూర్చోని నిరసన తెలిపారు.