హైదరాబాద్, జూలై 25 (నమస్తే తెలంగాణ): బడ్జెట్లో రూ. 17,700 కోట్లను దళితబంధు కోసం కేటాయించిన గత ప్రభుత్వం ఒక్క రూపాయి కూడా విడుదల చేయకుండా నిర్లక్ష్యంగా వ్యవహరించిందని డిప్యూటీ సీఎం భట్టివిక్రమార్క ఆరోపించారు. ఈ బడ్జెట్లో దళితబంధు ప్రస్తావన లేదన్న కేసీఆర్ మాటలు చూస్తుంటే నవ్వాలో? ఏడ్వాలో అర్థం కాకుండా ఉందని ఎద్దేవా చేశారు. శాసనసభలో బడ్జెట్ సమర్పించిన తర్వాత అసెంబ్లీ మీడియా హాల్-1లో మీడియాతో చిట్చాట్ నిర్వహించారు. ఈ సందర్భంగా డిప్యూటీ సీఎం మాట్లాడుతూ.. ఎస్సీ ఎస్టీ సబ్ప్లాన్ నిధులను గత ప్రభుత్వం మాదిరిగా మళ్లించబోమని పేర్కొన్నారు. బ్యాక్లాగ్ నిధులను కూడా కలుపుకొని దళిత, గిరిజనులకు ఎస్సీ ఎస్టీ సబ్ప్లాన్ నిధులను పూర్తిస్థాయిలో ఖర్చు పెడతామని తెలిపారు. సంక్షేమం,అభివృద్ధికి సమభాగంలో నిధులు వెచిస్తామని పేర్కొన్నారు. హైదరాబాద్లో మౌలిక వసతుల కల్పనకు ఎన్నడూ లేని విధంగా బడ్జెట్లో రూ.10 వేల కోట్లు కేటాయించినట్టు వివరించారు. హైదరాబాద్లో ఉద్యోగ వ్యవస్థలకు, ఎకోసిస్టం అభివృద్ధికి కావాల్సిన నిధులను పెట్టుబడిగా పెడుతూ ప్రభుత్వం ముందుకు వెళ్తున్నదని తెలిపారు. ఓ విజన్తో హైదరాబాద్లో సిల్స్ యూనివర్సిటీ ఏర్పాటు చేయనున్నట్టు చెప్పారు.