హైదరాబాద్ సిటీబ్యూరో, మే 5 (నమస్తే తెలంగాణ): వందేండ్ల చరిత్ర కలిగిన ఉస్మానియా యూనివర్సిటీలో నీటి కొరత, కరెంట్ కోతలు నిజమనే విషయం మరోసారి రుజువైంది. ముఖ్యమంత్రి రేవంత్రెడ్డి సమక్షంలోనే సికింద్రాబాద్ కాంగ్రెస్ పార్టీ ఎంపీ అభ్యర్థి దానం నాగేందర్ ఉస్మానియా యూనివర్సిటీలో నీటి కొరత, కరెంట్ కోతలు ఉన్నది నిజమేనని స్పష్టంచేశారు. దానిని పరిష్కరించాల్సి ఉన్నదని చెప్పారు. సికింద్రాబాద్ పార్లమెంట్ పరిధిలో ఆదివారం జరిగిన రోడ్ షోలో ప్రజల సాక్షిగా దానం ఈ వ్యాఖ్యలు చేశారు. పక్కనే ఉన్న సీఎం రేవంత్రెడ్డి ఈ వ్యాఖ్యల పట్ల ఎలాంటి అభ్యంతరం చెప్పలేదు. అంటే ప్రభుత్వం కావాలనే ఓయూ ఘటనను దాచిపెట్టిందని ప్రజలు అభిప్రాయపడుతున్నారు. ఈ మాటలు సోషల్ మీడియాలో వైరల్ అవుతుండగా ఓయూ ఘటనను మరోసారి ప్రజల్లో చర్చనీయాంశంగా మారింది.
నాడు దాచేందుకు ఆపసోపాలు
వారం రోజుల క్రితం ఓయూలో ఉన్న నీటి కొరత, కరెంట్ కోతల కారణంగా నెల రోజులపాటు సెలవులు ప్రకటిస్తూ చీఫ్ వార్డెన్ నోటీసు ఇచ్చారు. ఈ విషయాన్ని మాజీ సీఎం, బీఆర్ఎస్ అధినేత కేసీఆర్ ఎక్స్ వేదికగా ఎండగట్టారు. ‘తాగునీటి కొరతలేదు.. కరెంట్ కోతలు లేవు.. అని బుకాయిస్తున్న రాష్ట్ర ప్రభుత్వం ఇప్పుడు ఈనోటీసుకు ఏం సమాధానం చెప్తుంది?’ అని నిలదీశారు. నెటిజన్లు సైతం పెద్ద ఎత్తున స్పందించారు. ప్రభుత్వ తీరును ఎండగట్టారు. దిద్దుబాటు చర్యలకు దిగిన రాష్ట్ర సర్కారు.. హడావుడిగా విద్యుత్తు, జలమండలి అధికారులతో వేర్వేరుగా ప్రకటనలు ఇప్పించింది. కరెంట్ కోతలు లేవని, నీటి కొరత లేదని బుకాయించింది. కానీ, నీటికొరత తీర్చాలని లేడీస్ హాస్టల్ విద్యార్థినులు చేసిన ధర్నాలు, ఆందోళనల వార్తలు మీడియాలో రావడంతో సర్కారు నాలుక మడతేసింది. తక్షణమే తాగునీటి సరఫరా చర్యలు చేపడతామని చెప్పింది. ఓయూ ఘటనపై డిప్యూటీ సీఎం భట్టి విక్రమార్క సైతం స్పందించారు. తక్షణమే చర్యలు చేపడుతున్నట్టు ప్రకటించారు. నీటి కొరత, కరెంట్ కోతల కారణంగా సెలవులు ప్రకటించిన చీఫ్ వార్డెన్పై షోకాజ్ నోటీసు జారీచేశారు.
స్వయంగా స్పందించిన సీఎం
మరోసటి రోజు ఓయూ ఘటనపై సీఎం రేవంత్రెడ్డి కూడా స్వయంగా ఎక్స్లో పోస్టు పెట్టారు. నిరుడు కూడా తాగునీటి కొరత, కరెంట్ కోతల కారణంగా ఓయూలో సెలవులు ఇచ్చారంటూ ఓ నోటీసు పోస్టు చేశారు. వెంటనే స్పందించిన ఓయూ విద్యార్థి నాయకుడు సీఎం చేసిన నోటీసు ఫేక్ అని, ఇదిగో ఇదే నిజం అని మరో నోటీసు పోస్టు చేశారు. ఏది నిజమైన నోటీసు, ఏదీ ఫేక్ నోటీసు అనేది తేల్చకుండానే ఓయూ అధికారులు, విద్యార్థి నాయకుడితోపాటు బీఆర్ఎస్ నేత క్రిశాంత్పై తప్పుడు నోటీసు సోషల్మీడియాలో పోస్టుచేసి ప్రజలను తప్పుదోవ పట్టిస్తున్నారని ఓయూ పోలీసులకు ఫిర్యాదు చేశారు. ఈ కేసులో ఓయూ నేతతోపాటు క్రిశాంక్ను పోలీసులు అదుపులోకి తీసుకున్న సంగతి తెలిసిందే. ఇంత తతంగం జరిగి రాష్ట్రస్థాయిలో వివాదాస్పదమైన ఉస్మానియా యూనివర్సిటీ నీటి కొరత, కరెంట్ కోతల ఘటనను కాంగ్రెస్ పార్టీ ఎంపీ అభ్యర్థి దానం నాగేందర్ సీఎం సమక్షంలోనే అంగీకరించడం సంచలనంగా మారింది. ఓయూలో నీటి కొరత, కరెంట్ కోతలు నిజమేనని, ప్రభుత్వమే కావాలని దానిని దాస్తుందని ప్రజలు చర్చించుకుంటున్నారు.
ఓయూ పోలీసుల కస్టడీలో బీఆర్ఎస్ నేత క్రిశాంక్
ఉస్మానియా యూనివర్సిటీ, మే 5: ఉస్మానియా యూనివర్సిటీ సెలవులకు సంబంధించిన నకిలీ సర్క్యులర్ను తయారుచేశారనే అభియోగంతో జ్యుడీషియల్ రిమాండ్లో ఉన్న బీఆర్ఎస్ సోషల్ మీడియా కన్వీనర్ మన్నె క్రిశాంక్ను ఓయూ పోలీసులు కస్టడీలోకి తీసుకున్నారు. నిజానిజాలు నిర్ధారించేందుకు నిందితుడిని రెండు రోజుల కస్టడీకి ఇవ్వాలని 4వ అదనపు చీఫ్ మెట్రోపాలిటన్ మెజిస్ట్రేట్ కోర్టులో పోలీసులు పిటిషన్ దాఖలు చేయగా, ఒక రోజు కస్టడీకి న్యాయస్థానం అంగీకరించింది. ఈ నేపథ్యంలో చంచల్గూడ జైళ్లో ఉన్న ఆయనను ఆదివారం ఓయూ పోలీస్ స్టేషన్కు తరలించారు. సోమవారం వరకు ఆయన పోలీసుల కస్టడీలో ఉండనున్నారు. క్రిశాంక్ సెల్ఫోన్ మిస్సింగ్, కాల్ డేటా, వాట్సాప్ మెసేజ్లపై పోలీసులు ఆరా తీసినట్టు సమాచారం.