ముసుగుల్లేని మనుషుల మధ్య సంచరిస్తున్నట్టు, స్వచ్ఛమైన మట్టిని ఒళ్లంతా లేపనంలా పూసుకున్నట్టు, ప్లాస్టిక్ నవ్వుల్లేని సమాజంలో జీవిస్తున్నట్టు అనిపిస్తుంది ఎమ్వీ రామిరెడ్డి కవిత్వాన్ని చదువుతున్నప్పుడు. గుండెల్లో తడి, అక్షరంలో నిజాయతీ, వాక్యంలో ఆర్ద్రత ఉన్నప్పుడే ఇదంతా సాధ్యం అవుతుంది. ఆయన కవనంలోనూ, వచనంలోనూ అదే ప్రగాఢ అనుభూతే. తాజా కవితా సంకలనం ఇంకొంత చిక్కదనాన్ని నింపుకొని వచ్చింది. ‘చిన్నప్పుడు మా అమ్మమ్మ చెప్పింది.. మట్టిని మించిన ముడిపదార్థం లేదని’ అని మొదలుపెట్టి మట్టికొట్టుకుపోయిన స్వచ్ఛమైన మట్టితనాన్ని గుర్తుచేసుకుంటారు.
అక్కడితో ఆగకుండా.. డిజిటల్ శక్తుల మీద మూకుమ్మడి యుద్ధం ప్రకటిస్తారు. తన హరిత సైన్యంలో చేరమంటూ ఆత్మీయులకు పిలుపునిస్తారు. జ్ఞాపకాల కోసం తనను తాను తవ్వుకునే అన్వేషణాశీలిని ఓ కవితలో చూస్తాం. మాటలోని మర్మాన్నీ, మాటలతో కట్టే అబద్ధాల హర్మ్యాల్నీ త్రీ డైమెన్షన్ ఎఫెక్ట్లో కళ్లముందు ఉంచడంలోనూ కవి దిట్టే.
కోడింగ్లో కొట్టుకుపోతూ, డెడ్లైన్స్ అనే మరణరేఖలలో చిక్కుకుపోతూ ఉక్కిరిబిక్కిరి అవుతున్న సాఫ్ట్వేర్ కుర్రాళ్లకు బతకడం నేర్పించిన సందర్భమూ ఒకటుంది. బంధాలు బీటలువారుతున్న సమయంలో, ప్రేమలు దోమకాటు వ్యాధిలాంటి రోగమేదో వచ్చి చచ్చిబతుకుతున్న నేపథ్యంలో.. మనుషుల మధ్య దూరాలను కొలవడానికి వినూత్న కొలమానాలు కనిపెట్టాల్సిన సమయం వచ్చిందని గుర్తుచేస్తారు రామిరెడ్డి. అవును, ఇదే మన తక్షణ కర్తవ్యం. కవిసేనలో చేరి అనుబంధాల జడివాన కురిపిద్దాం రండి.
సైద్ధాంతిక యుద్ధాల్లేవు. విలువలకు విలువలూ లేవు. ఇప్పుడు నడుస్తున్నది రివెంజ్ పాలిటిక్స్ యుగం. ఎన్నికలంటే ఇప్పుడొక కుట్ర. ప్రత్యర్థి పరమశత్రువు. కోట్లు కుమ్మరించైనా, ఉద్వేగాలు రెచ్చగొట్టి అయినా, వరాలు గుప్పించి అయినా అతని మీద గెలవాల్సిందే. గెలుపుతోనే నిలిచిపోతే కిక్కేం ఉంటుందీ? నాశనం చేయాలి. సర్వనాశనం చేయాలి. మూలాలు దెబ్బతీయాలి. గాయాలు కెలికి కెలికి వదిలి పెట్టాలి. అతను గిలగిలా కొట్టుకుంటున్న దృశ్యాన్ని చూసి మురిసిపోవాలి.
పార్టీలకూ, అభ్యర్థులకూ అతీతమైన రాజకీయ వారసత్వమిది. సతీష్ చందర్ నవల ‘నేరం-బేరం’ ఈ రక్త చరిత్రనే వ్యంగ్యంగా చెప్పింది. ‘పవర్ పాలిటిక్స్ రీడిస్కవర్డ్’ పుస్తక ఉపశీర్షిక. ‘కంచు మోగినట్లు.. చుంచు కూసినట్లు’, ‘పతి ఒక్కడే.. విధవలు ఇద్దరు’ అయినా.. ఆ సత్యాన్ని పబ్లిక్ గార్డెన్స్ చౌరస్తాలో నగ్నంగా నిలబెట్టేవే. విగ్రహ రాజకీయాలతో నడిచే ఆగ్రహ నాటకం ‘ఏడ్వమంటే ఏడ్చేదీ..!’. కేంద్రానికి కళ్లూ చెవులుగా మారిన గవర్నర్ పదవుల్నీ, రాచభవనాల వెనుక రాచలీలల్నీ కూడా వదల్లేదు సతీష్ చందర్. మొత్తం ముప్పై ఏడు అధ్యాయాలు.. ప్రజాస్వామ్య ప్రియుల్ని నిశ్శబ్దంగా ఏడిపిస్తాయి.
– రచన: సతీష్ చందర్
పేజీలు: 171; వెల: రూ.200
ప్రతులకు: ప్రధాన పుస్తక కేంద్రాలు.