Nanammal | యోగం అంటే కలవటం అని అర్థం. ఆధ్యాత్మిక సాధకులు దేహాత్మను, పరమాత్మను కలిపే వారధిగా యోగాను భావిస్తారు. దేహానికి ఆరోగ్యాన్ని ప్రసాదించే వరప్రదాయిని యోగా అని అందరూ నమ్ముతారు. యోగ సాధన మనిషికి శారీరక, మానసిక స్వస్థతను చేకూరుస్తుంది. యోగాభ్యాసం అంతిమ లక్ష్యం దైవ సాయుజ్యం అని ఆర్ష ధర్మం పేర్కొన్నది. అయితే, ఈ మార్గంలో ప్రాథమికంగా కలిగే ప్రయోజనాలు కోకొల్లలు. పతంజలి మహర్షి జగతికి అందించిన ఆసనాల శాసనాలను ఎందరో భావితరాలకు చేరువ చేశారు. అందులో ఒకరు తమిళనాడుకు చెందిన వి.నానమ్మల్. 99 ఏండ్లు జీవించిన ఈ సాధకురాలి జీవితమంతా యోగసాధనలోనే గడిచిపోయింది.
నానమ్మల్ ఎనిమిదో ఏట ఆసనాలు వేయడం మొదలుపెట్టారు. తండ్రి ప్రోత్సాహంతో యోగాభ్యాసంలో అంచెలంచెలుగా ఎదిగారు. యాభై ఆసనాలు సునాయాసంగా వేయగలరు. తన 52వ యేట కోయంబత్తూరులో 1972లో ‘ఓజోన్ యోగా సెంటర్’ను ప్రారంభించారు. ఆమె కాలం చేసేవరకు దాదాపు 10 లక్షల మంది ఔత్సాహికులకు యోగాసనాలు నేర్పించారు. వీరిలో వందలాది మంది ఇప్పుడు దేశదేశాల్లో యోగా గురువులుగా స్థిరపడ్డారు. యోగాకు ప్రాచుర్యం కల్పించడంలో ఆమె చేసిన కృషికిగాను 2016లో కేంద్ర ప్రభుత్వం నారీశక్తి పురస్కారంతో సత్కరించింది.
2019లో ‘పద్మశ్రీ’ బిరుదుతో గౌరవించింది. తన జీవితాన్ని యోగాకే అంకితం చేసిన నానమ్మల్ 99 ఏండ్ల వయసులో 2019 అక్టోబర్ 26న కన్నుమూశారు. ఆమె గతించినా.. నానమ్మల్ నెలకొల్పిన ‘ఓజోన్ యోగా సెంటర్’ సేవలు నేటికీ కొనసాగుతున్నాయి. ఆమె శిష్యులు, ప్రశిష్యులు యోగాసనాలు నేర్పుతూ లక్షలాది మందికి ఆరోగ్యాన్ని ప్రసాదిస్తూ… నానమ్మల్ స్ఫూర్తిని నేటికీ కొనసాగిస్తున్నారు.