Union Budget | ఢిల్లీ: కేంద్ర ప్రభుత్వం మంగళవారం లోక్సభలో ప్రవేశపెట్టిన 2024-25 బడ్జెట్లో క్రీడారంగానికి అరకొర నిధులే దక్కాయి. కేంద్ర ఆర్థిక శాఖ మంత్రి నిర్మలా సీతారామన్ క్రీడలకు ఈ బడ్జెట్లో రూ. 3,442.32 కోట్ల కేటాయింపులు చేశారు. గతేడాది (రూ. 3,396.80 కోట్లు)తో పోలిస్తే తాజా బడ్జెట్లో పెరిగింది రూ. 45.36 కోట్లు మాత్రమే. ఇక గ్రామీణ స్థాయిలో క్రీడాకారులను వెలికితీసేందుకు మోడీ సర్కారు ప్రతిష్టాత్మకంగా చేపట్టిన ‘ఖేలో ఇండియా’ కార్యక్రమానికి రూ. 900 కోట్లను కేటాయించారు.
గత ఆర్థిక సంవత్సరం కంటే అదనంగా ఇచ్చింది రూ. 20 కోట్లే. జాతీయ క్రీడా సమాఖ్య (ఎన్ఎస్ఎఫ్)కు రూ. 340 కోట్లు, టార్గెట్ ఒలింపిక్ పోడియం స్కీమ్ ‘టాప్స్’కు రూ. 822.60 కోట్లు, నేషనల్ యాంటీ డోపింగ్ ఏజెన్సీ (నాడా)కి రూ. 22.30 కోట్లు, నేషనల్ డోప్ టెస్టింగ్ లేబోరేటరీ (ఎన్డీటీఎల్)కు రూ. 22 కోట్లు కేటాయిస్తున్నట్టు నిర్మల పేర్కొన్నారు.