న్యూయార్క్: టీ20 వరల్డ్ కప్లో పసికూనలు సైతం పోరాడుతుంటే మాజీ చాంపియన్ శ్రీలంక మాత్రం తమ తొలి మ్యాచ్లో కనీస పోరాటం లేకుండానే చేతులెత్తేసింది. సౌతాఫ్రికా బౌలర్లు సమిష్టిగా రాణించగా నిప్పులు చెరిగే బంతులుతో విజృంభించిన పేసర్ అన్రిచ్ నోకియా (4/7) సంచలన స్పెల్కు లంకేయులు విలవిల్లాడారు. ఫలితంగా దక్షిణాఫ్రికా.. 6 వికెట్ల తేడాతో హసరంగ సేనపై ఘనవిజయం సాధించింది. సఫారీ బౌలర్ల ధాటికి మొదట బ్యాటింగ్ చేసిన లంక.. 19.1 ఓవర్లలో 77 పరుగులకే ఆలౌట్ అయింది.
ఓపెనర్ కుశాల్ మెండిస్ (19) టాప్ స్కోరర్ కాగా 8 మంది బ్యాటర్లు సింగిల్ డిజిట్కు పరిమితమయ్యారు. ‘మ్యాన్ ఆఫ్ ది మ్యాచ్’ నోకియాతో పాటు మరో పేసర్ రబాడా (2/21), స్పిన్నర్ కేశవ్ మహారాజ్ (2/22) చెలరేగారు. స్వల్ప లక్ష్యాన్ని ఛేదించే క్రమంలో సౌతాఫ్రికా సైతం తడబాటుకు లోనై విజయం కోసం 16.2 ఓవర్లు ఆగాల్సి వచ్చింది. క్వింటన్ డికాక్ (27 బంతుల్లో 20, 1 సిక్స్), క్లాసెన్ (22 బంతుల్లో 19 నాటౌట్, 1 ఫోర్, 1 సిక్స్) రాణించారు.
మొదట బ్యాటింగ్ చేసిన లంక.. 4వ ఓవర్లో ఓపెనర్ పతుమ్ నిస్సంక ఔట్ అయ్యాక క్రమం తప్పకుండా వికెట్లను కోల్పోయింది. నోకియా, మహారాజ్ లంకను కోలుకోనీయలేదు. ఆ జట్టు భారీ ఆశలు పెట్టుకున్న సమరవిక్రమ డకౌట్ అవగా అసలంక (6), కుశాల్ మెండిస్ (11), శనక (9) దారుణంగా విఫలమయ్యారు.
ఛేదనలో రెండో ఓవర్లోనే సఫారీలు హెండ్రిక్స్ (4) వికెట్ నష్టపోయింది. కెప్టెన్ మార్క్మ్ (12), ట్రిస్టన్ స్టబ్స్ (13) విఫలమైనా క్లాసెన్, మిల్లర్ (6 నాటౌట్) లంకకు అవకాశమివ్వకుండా మ్యాచ్ను పూర్తిచేశారు.
శ్రీలంక: 19.1 ఓవర్లలో 77 ఆలౌట్ (మెండిస్ 19, మాథ్యూస్ 16, నోకియా 4/7, రబాడా 2/21).
దక్షిణాఫ్రికా: 16.2 ఓవర్లలో 80/4 (డికాక్ 20, క్లాసెన్ 19 నాటౌట్, హసరంగ 2/22, శనక 1/6)