Wimbledon : వరల్డ్ మూడో నంబర్ అరినా సబలెంక(Aryna Sabalenka) ప్రతిష్ఠాత్మక వింబుల్డన్ టోర్నీ నుంచి వైదొలిగింది. తొలి మ్యాచ్లో అమెరికా అమ్మాయి ఎమినా బెక్తాస్తో సబలెంక తలపడాల్సింది. కానీ, భుజం గాయం కారణంగా టోర్నీలో పాల్గొనడం లేదని సోమవారం బెలారస్ భామ చెప్పింది. దాంతో, ఆమె స్థానంలో ఎరికా అండ్రీవా వింబుల్డన్ ఆడనుంది. మెగా టోర్నీ నుంచి ముందుగానే తప్పుకోవడంతో తన గుండె పగిలినంత బాధ ఉందని సంబలెంక అంది.
‘విశ్రాంతి లేకుండా వింబుల్డన్కు వెళ్లితే గాయం మరింత తీవ్రమయ్యే అవకాశముందని వైద్య బృందం సూచింది. దాంతో, ఈ కఠిన నిర్ణయానికి వచ్చాన’ని సబలెంక వెల్లడించింది. టాప్ సీడ్లలో ఒకరైన సబలెంక గైర్హాజరీలో ఇగా స్వియాటెక్, కొకొ గాఫ్, ఎలీనా రాడుకానులలో ఒకరు చాంపియన్ అయ్యే చాన్స్ ఉంది.
‘నేను వంద శాతం ఫిట్నెస్తో లేను. ఈ ఏడాది వింబుల్డన్ ఆడట్లేదనే విషయాన్ని మీతో పంచుకుంటున్నందుకు బాధగా ఉంది. నేను ఎంతో ప్రయత్నించాను. ఈ టోర్నమెంట్ కోసం రోజంతా సాధన చేశా. కానీ, నా భుజం సహకరించడం లేదు. వింబుల్డన్ నాకు ఎంతో ముఖ్యమైనది. అయితే.. వచ్చే ఏడాది నేను మరింత బలంగా తిరిగొస్తానని మీకు ప్రామిస్ చేస్తున్నా’ అని సబలెంక తన ఇన్స్టాగ్రామ్లో రాసుకొచ్చింది.
ఈ ఏడాదిని సబలెంక ఆస్ట్రేలియన్ ఓపెన్ ట్రోఫీతో ఘనంగా ఆరంభించింది. ఆ తర్వాత మాడ్రిడ్, రోమ్ ఓపెన్లో నంబర్ 1 ఇగా స్వియాటెక్ చేతిలో ఓడి రన్నరప్తో సరిపెట్టుకుంది. అనంతరం.. ఫ్రెంచ్ ఓపెన్లో 17 ఏండ్ల మిర్రా అండ్రీవా ధాటికి సబలెంక తలొంచింది. యూఎస్ ఓపెన్లోనూ బెలారస్ స్టార్కు అమెరికా టీనేజర్ కొకో గాఫ్ చెక్ పెట్టింది.