Rohit Sharma : పొట్టి ప్రపంచ కప్ టోర్నీకోసం అమెరికా వెళ్లిన భారత జట్టు కెప్టెన్ రోహిత్ శర్మ(Rohit Sharma) బాస్కెట్ బాల్ ట్రోఫీతో కెమెరా కంటపడ్డాడు. శుక్రవారం న్యూయార్క్లోని నస్సావు కౌంటీ ఇంటర్నేషనల్ క్రికెట్ స్టేడియానికి హిట్మ్యాన్ వెళ్లాడు. ఒక టేబుల్ మీద టీ20 వరల్డ్ కప్.. ఆ పక్కనే ఎన్బీఏ (NBA) విజేతలకు ఇచ్చే లారీ ఒ బ్రియెన్ ట్రోఫీ(Larry O’Brein Trophy)ని అతడు చూశాడు. బంగారు వర్ణంలో ధగధగ మెరిసిపోతున్న ఆ కప్పును చేతుల్లోకి తీసుకొని ఫొటోలకు పోజిచ్చాడు. ప్రస్తుతం ఆ ఫొటలో నెట్టింట వైరల్ అవుతున్నాయి.
అనంతరం ”మీ అభిమాన బాస్కెట్ బాల్ ఆటగాడు ఎవరు?’ అనే ప్రశ్నకు రోహిత్.. ‘మైఖేల్ జోర్డాన్'(Michael Zordan) అని బదులిచ్చాడు. ‘చికాగో బుల్స్’ (Chicago Bulls) జట్టు తరపున జోర్డాన్ ఆడిన తీరు చూసి తాను స్ఫూర్తి పొందానని తెలిపాడు. ‘జోర్డాన్తో పాటు లెబ్రాన్ జేమ్స్, స్టెఫ్ కర్రీల ఆట చూసేందుకు ఇష్టపడుతా. లారీ ఒబ్రియెన్ ట్రోఫీ చాలా బరువుగా ఉంది.అందుకేనేమో బాస్కెట్ బాల్ ఆటగాళ్లు భారీకాయంతో ఉంటారు’ అని టీమిండియా సారథి జోక్ చేశాడు.
పొట్టి వరల్డ్ కప్ సంగ్రామానికి మరో కొన్ని గంటల్లో తెరలేవనుంది. అమెరికా, వెస్టిండీస్లు ఆతిథ్యమిస్తున్న మెగా టోర్నీ జూన్ 1న షురూ కానుంది. భారత జట్టు జూన్ 5న ఐర్లాండ్(Ireland)తో తొలి మ్యాచ్ ఆడనుంది. కెప్టెన్గా, ఆటగాడిగా బహుశా రోహిత్కు ఇదే చివరి టీ20 వరల్డ్ కప్. దాంతో, టీమిండియా ఐసీసీ ట్రోఫీ(ICC Trophy) అందించే వెళ్లాలనే పట్టుదలతో హిట్మ్యాన్ ఉన్నాడు. ఐపీఎల్లో సెంచరీతో మెరిసిన రోహిత్ తనకు ఎంతో ఇష్టమైన పొట్టి ఫార్మాట్లో దంచి కొడితే భారత్కు శుభారంభం దక్కినట్టే.