న్యూయార్క్: టీ20 వరల్డ్కప్లో రోహిత్ శర్మ(Rohit Sharma) గాయపడ్డ విషయం తెలిసిందే. ఐర్లాండ్తో మ్యాచ్ జరిగిన సమయంలో బ్యాటింగ్ చేస్తున్నప్పుడు అతని చేయికి బంతి తగిలింది. పేస్ బౌలర్ జోష్ లిటిల్ బౌలింగ్లో బంతి బలంగా తగలడంతో అతను గ్రౌండ్ నుంచి రిటైర్డ్ హార్ట్గా వెళ్లిపోయాడు. ఆ మ్యాచ్లో రోహిత్ 37 బంతుల్లోనే 52 రన్స్ చేశాడు. న్యూయార్క్లోని నసావు కౌంటీ ఇంటర్నేషనల్ క్రికెట్ స్టేడియంలో పిచ్ విచిత్రంగా ప్రవర్తిస్తున్న నేపథ్యంలో.. బ్యాటర్లు ఇబ్బందులు పడుతున్నారు. కొత్త పిచ్ కావడంతో బంతులు నేరుగా బ్యాటర్ల మీదకే వస్తున్నాయి. కానీ స్వల్ప లక్ష్యంతో బరిలోకి దిగిన ఇండియా 8 వికెట్ల తేడాతో ఐర్లాండ్పై విక్టరీ కొట్టింది.
9వ ఓవర్ రెండో బంతి రోహిత్ చేయికి తగిలింది. అయితే 10వ ఓవర్లో అతను గ్రౌండ్ నుంచి వెళ్లిపోయాడు. ఆ గాయం సీరియస్గా లేదని తెలుస్తోంది. మ్యాచ్ ముగిసిన తర్వాత ఈ విషయాన్ని రోహిత్ చెప్పాడు. కాస్త నొప్పిగా ఉందని కెప్టెన్ రోహిత్ వెల్లడించాడు. ఇదే మ్యాచ్లో రిషబ్ పంత్కు కూడా 11వ ఓవర్లో మోచేతికి బంతి తగిలింది. ఫిజియో నుంచి ట్రీట్మెంట్ తీసుకున్న పంత్ ఇన్నింగ్స్ను పూర్తి చేశాడు.
నసావు కౌంటీ ఇంటర్నేషనల్ క్రికెట్ స్టేడియంపై చాలా విమర్శలు వస్తున్నాయి. ఆ పిచ్పై బౌన్సు ఎక్కువగా ఉన్నట్లు ఆరోపణలున్నాయి. ఇక అవుట్ ఫీల్డ్ కూడా స్లోగా ఉండడం మరో కారణమైంది. పిచ్ ఎలా ఉంటుందో చెప్పడం కష్టమని టాస్ సమయంలోనే చెప్పినట్లు రోహిత్ తెలిపాడు. కేవలం అయిదు నెలల క్రితం నిర్మించిన ఈ పిచ్ గురించి చెప్పడం కష్టమే అవుతుందన్నాడు. సెకండ్ బ్యాటింగ్ చేస్తున్నప్పుడు కూడా పిచ్ సెటిల్ కాలేదన్నాడు. సరైన లెన్త్లో బౌలింగ్ చేస్తే, ఇలాంటి పిచ్లపై వికెట్లు ఈజీగా దక్కుతాయన్నాడు.
ఇక జూన్ 9వ తేదీన ఇదే పిచ్పై పాకిస్థాన్ జట్టుతో ఇండియా తలపడనున్నది. పాక్తో మ్యాచ్ సమయంలో కూడా ఇలాంటి పరిస్థితే ఎదుర్కోవాల్సి ఉంటుందని, దీని కోసం ప్రిపేర్ కావాలని, ప్రతి ఒక ప్లేయర్ తమ సత్తా చూపించాల్సి వస్తుందని రోహిత్ పేర్కొన్నాడు.