లక్నో: టీమ్ఇండియా స్టార్ పేసర్ మహ్మద్ షమీ 2018లో తనపై వచ్చిన మ్యాచ్ ఫిక్సింగ్ ఆరోపణలు, భార్య నమోదు చేసిన గృహహింస కేసు కారణంగా మానసికంగా చితికిపోయాడా? అంటే అవుననే అన్నాడు అతడి స్నేహితుడు ఉమేశ్ కుమార్. ఇటీవల ఓ పాడ్కాస్ట్లో మాట్లాడిన ఉమేశ్.. “షమీ ఆ దశలో చాలా సమస్యలతో పోరాడాడు. అతడు అప్పుడు (2018లో) నాతోనే ఉండేవాడు. పాకిస్థాన్తో చాంపియన్స్ ట్రోఫీలో ఓడిపోయాక అతడి భార్య హసీన్ జహాన్.. షమీపై మ్యాచ్ ఫిక్సింగ్ ఆరోపణలు చేయడంతో బీసీసీఐ దీనిపై విచారణ చేపట్టింది. దానికి షమీ ఎంతగానో కుమిలిపోయాడు. ‘నేను దేనినైనా భరిస్తాను గానీ దేశానికి ద్రోహం చేశాననే ఆరోపణలను మాత్రం సహించలేను’ అని నాతో అన్నాడు. ఆ వార్తలు వచ్చిన రోజు నేను షమీతోనే ఉన్నా.
ఆ రోజు తెల్లవారుజామున 4 గంటలకు నేను నీళ్లు తాగడానికి కిచెన్లోకి వెళ్లేటప్పుడు అదే సమయంలో 19వ అంతస్తులో ఉన్న మా బాల్కనీలో షమీ నిల్చుని ఉండటం నేను చూశాను. అప్పుడేం జరిగిందో నేను ఊహించగలను. ఆ రాత్రి షమీ జీవితంలో చాలా సుదీర్ఘంగా గడిచింది. ఆ తర్వాత ఒక రోజు మేం మాట్లాడుకుంటుండగా బీసీసీఐ నుంచి అతడికి క్లీన్ చిట్ రాగానే షమీ చాలా సంతోషపడ్డాడు. ఆరోజు అతడు ప్రపంచకప్ గెలిచిన దాని కంటే ఎక్కువ సంతోషించాడు..’ అని వ్యాఖ్యానించాడు.