Karlos Nasar | పారిస్: బల్గేరియా వెయిట్ లిఫ్టర్ కార్లొస్ నాసర్ రికార్డు బరువు ఎత్తి పారిస్లో కొత్త చరిత్ర లిఖించాడు. 21 ఏండ్ల ఈ కుర్రాడు పురుషుల 89 కిలోల విభాగంలో ఏకంగా 404 కిలోల బరువును ఎత్తి ఒలింపిక్ రికార్డులతో పాటు ప్రపంచ రికార్డుల దుమ్ము దులిపాడు. స్నాచ్లో 180 కిలోలు ఎత్తిన కార్లొస్.. క్లీన్ అండ్ జర్క్లో రికార్డు స్థాయిలో 224 కిలోల బరువును ఎత్తేశాడు. క్లీన్ అండ్ జర్క్లో ఇప్పటి వరకూ ఇదే అత్యుత్తమం.
కాగా గతేడాది బాత్రూమ్లో గోడ కూలి తీవ్ర గాయాల పాలై సర్జరీ చేయించుకున్న కార్లొస్.. ఏడాది కాలంలో పూర్తిగా కోలుకోవడమే గాక రికార్డు స్థాయిలో బరువును ఎత్తి పసిడి గెలుచుకోవడం విశేషం. ఇదే పోటీలో రజతం సాధించిన కొలంబియా అథ్లెట్ యీసన్ లోపెజ్ (390 కిలోలు) స్నాచ్లో 182 కిలోలతో వరల్డ్ రికార్డు నమోదు చేసుకున్నాడు. ఇటలీ ప్లేయర్ అంటానియో 383 కిలోలు ఎత్తి కాంస్యం గెలుచుకున్నాడు.