Abhinav Bindra : ఒలింపిక్స్లో వ్యక్తిగత స్వర్ణంతో చరిత్ర సృష్టించిన అభినవ్ బింద్రా (Abhinav Bindra)కు అరుదైన గౌరవం లభించింది. అంతర్జాతీయ ఒలింపిక్స్ కమిటీ బింద్రాకు అత్యున్నత పురస్కారం ప్రకటించింది. సోమవారం ఐఓసీ ఈ మాజీ షూటర్కు ‘ఒలింపిక్ ఆర్డర్ అవార్డు'(Olympic Order Award)ను ప్రదానం చేసింది. విశ్వక్రీడల్లో పతకంతో మెరవడమే కాకుండా, ఒలింపిక్స్కు విశేషమైన ప్రాచుర్యం కల్పించినందుకుగానూ బింద్రాకు ఈ అత్యున్నత అవార్డు ఇస్తున్నట్టు ఐఓసీ వెల్లడించింది. ఈ విషయాన్ని భారత క్రీడాశాఖ మంత్రి మన్సుఖ్ మాండవీయ(Mansukh Mandaviya) ఎక్స్ వేదికగా తెలియజేశారు.
‘ఒలింపిక్ క్రీడల ప్రచారంలో విశేష సేవలకుగానూ ఒలింపిక్ ఆర్డర్ అవార్డు గెలుపొందిన అభినవ్ బింద్రాకు ధన్యవాదాలు. ఈ గౌరవంతో యావత్ దేశం గర్వపడుతోంది. ఈ అవార్డుకు బింద్రా అన్నివిధాలా అర్హుడు. అతడి పేరు ఒక్కటే ఎందరో షూటర్లు, ఒలింపిక్స్లో పోటీ పడేవాళ్లకు స్ఫూర్తి మంత్రం అయింది’ అని మన్సుఖ్ తన పోస్ట్లో రాసుకొచ్చారు.
Congratulations to @Abhinav_Bindra on being awarded the Olympic Order for outstanding contributions to the Olympic Movement!
His achievement fills us with pride and is truly well-deserved.
His name alone has inspired generations of shooters and Olympians. pic.twitter.com/w8i6Ykr09X
— Dr Mansukh Mandaviya (@mansukhmandviya) July 22, 2024
బీజింగ్ వేదికగా 2008లో జరిగిన ఒలింపిక్స్లో బింద్రా స్వర్ణం గెలుపొందాడు. వ్యక్తిగత విభాగంలో పసిడి సాధించిన తొలి భారతీయుడిగా బింద్రా రికార్డుకెక్కాడు. ప్రస్తుతం 41 ఏండ్ల వయసున్న ఈ మాజీ షూటర్ ఒలింపిక్స్కు విస్తృతమైన ప్రాచుర్యం కల్పించేందుకు కృషి చేస్తున్నాడు. అందుకనే అతడిని ఒలింపిక్ ఆర్డర్ అవార్డు వరించింది.
ఐఓసీ 1975 నుంచి ఈ అత్యున్నత పురస్కారాన్ని ఇస్తోంది. అంతకుముందు ఇదే అవార్డును ‘ఒలింపిక్ డిప్లొమా ఆఫ్ మెరిట్’ (Olympic Diploma Of Merit) పేరుతో ఇచ్చేవాళ్లు. అప్పటి నుంచి ఒలింపిక్స్లో పతకం గెలిచిన వాళ్లకు, విశ్వ క్రీడల ప్రచారానికి కృషి చేసిన వాళ్లకు ఈ అవార్డు ప్రకటిస్తున్నారు.