Davis Cup Tie: భారత టెన్నిస్ సింగిల్స్ ఆటగాళ్లు సుమిత్ నగాల్, శశికుమార్ ముకుంద్లు పాకిస్తాన్ వెళ్లి అక్కడ ఆడేందుకు విముఖత వ్యక్తం చేశారు. ఈ ఇద్దరూ వచ్చే ఏడాది డేవిస్ కప్ వరల్డ్ గ్రూప్ -1 ప్లేఆఫ్ టైలో భాగంగా 2024 ఫిబ్రవరిలో పాకిస్తాన్తో ఆడాల్సి ఉంది. ఇదివరకే భారత క్రికెట్ జట్టు పాకిస్తాన్ పర్యటించేదీ లేదని తేల్చి చెప్పగా తాజాగా టెన్నిస్లో కూడా మన ఆటగాళ్లు అక్కడికి వెళ్లేందుకు అంతగా ఆసక్తి చూపించకపోవడం గమనార్హం.
భారత్లో నెంబర్ వన్ ర్యాంకర్గా ఉన్న సుమిత్ (ప్రపంచ స్థాయిలో 141), 477వ ర్యాంకర్ శశికుమార్లు డేవిస్ కప్ టైలో పాల్గొనపోవడానికి కారణాలు వెల్లడించలేదు. అయితే సుమిత్కు ‘హార్డ్ కోర్టు’లలోనే ఆడటం అలవాటు. పాకిస్తాన్లోని గ్రాస్ కోర్టులో అతడికి ఇష్టం లేదని, అందుకే అతడు దాయాది దేశానికి వెళ్లేందుకు నిరాకరిస్తున్నాడని సమాచారం. మరోవైపు శశికుమార్ వ్యక్తిగత కారణాల వల్ల ఈ పోటీలకు దూరంగా ఉంటున్నాడని తెలుస్తున్నది.
India’s Tennis star Sumit Nagal has denied to tour Pakistan for Davis Cup saying grass court does not suit his game style. His partner also won’t take part in competition due to personal reasons. pic.twitter.com/FAe4nfDfK1
— Himanshu Pareek (@Sports_Himanshu) November 24, 2023
కాగా సుమిత్, శశికుమార్ తీసుకున్న నిర్ణయంపై ఆలిండియా టెన్నిస్ అసోసియేషన్ (ఐటా) అసంతృప్తి వ్యక్తం చేసింది. ఐటా సెక్రటరీ జనరల్ అనిల్ దపూర్ మాట్లాడుతూ.. ‘ఇది చాలా తప్పు. మీరు దేశం తరఫున ఆడుతున్నప్పుడు ఇలా చేయడం కరెక్ట్ కాదు. ఈ విషయాన్ని నేను ఎగ్జిక్యూటివ్ కమిటీ దృష్టికి తీసుకెళ్తాను. ఒకవేళ ఆటగాళ్లు గాయాల బారిన పడ్డారంటేనో లేక అనారోగ్యం కారణంగానో అయితే అది అర్థం చేసుకోవచ్చు. ముకుంద్ ఇలా చేయడం ఇదే కొత్త కాదు. అతడు గతంలో కూడా ఇలాగే చేశాడు..’ అని అసంతృప్తి వ్యక్తం చేశాడు.