అమ్మాయిలు అదరగొట్టారు. పరుగుల వరదకు చిరునామా అయిన చిన్నస్వామి స్టేడియంలో దక్షిణాఫ్రికాను భారత్ చెడుగుడు ఆడుకుంది. హర్మన్ప్రీత్కౌర్, స్మృతి మంధాన సూపర్ సెంచరీలతో కదంతొక్కారు. సఫారీ బౌలర్లను కసిగా వేటాడుతూ ఈ నాయక ద్వయం శతక గర్జన చేసింది. కౌర్, మంధాన వీరవిహారంతో భారత్ భారీ స్కోరు అందుకుంది. లక్ష్యఛేదనలో ఆదిలో తడబడ్డ దక్షిణాఫ్రికా..వోల్వార్డ్, కాప్ శతకాలతో అద్భుత పోరాట పటిమ కనబరిచింది. ఏ దశలోనూ పట్టువదలని టీమ్ఇండియా నాలుగు పరుగుల తేడాతో సఫారీలను మట్టికరిపించి మరో మ్యాచ్ మిగిలుండగానే వన్డే సిరీస్ను కైవసం చేసుకుంది. 646 పరుగులతో మహిళల వన్డే చరిత్రలో కొత్త రికార్డుతో పాటు పలు ఫీట్లు బద్దలయ్యాయి.
Team India | బెంగళూరు: స్వదేశంలో దక్షిణాఫ్రికాతో జరుగుతున్న మూడు వన్డేల సిరీస్ను భారత మహిళల క్రికెట్ జట్టు మరో మ్యాచ్ మిగిలుండగానే 2-0తో సొంతం చేసుకుంది. బెంగళూరులోని చిన్నస్వామి వేదికగా బుధవారం ఉత్కంఠగా జరిగిన ‘హై స్కోరింగ్ థ్రిల్లర్’లో టీమ్ఇండియా.. 4 పరుగుల తేడాతో గెలిచింది. టాస్ ఓడి మొదట బ్యాటింగ్ చేసిన భారత్.. స్మృతి మంధాన (120 బంతుల్లో 136, 18 ఫోర్లు, 2 సిక్సర్లు) వరుసగా రెండో సెంచరీతో కదం తొక్కగా కెప్టెన్ హర్మన్ప్రీత్ కౌర్ (88 బంతుల్లో 103 నాటౌట్, 9 ఫోర్లు, 3 సిక్సర్లు) అజేయ శతకంతో నిర్ణీత 50 ఓవర్లలో 3 వికెట్ల నష్టానికి 325 పరుగుల భారీ స్కోరు చేసింది.
మాల్బకు(2/51) రెండు వికెట్లు దక్కాయి. భారీ ఛేదనలో 67 పరుగులకే 3 కీలక వికెట్లు కోల్పోయిన దక్షిణాఫ్రికా.. సారథి లారా వోల్వార్డ్ (135 బంతుల్లో 135 నాటౌట్, 12 ఫోర్లు, 3 సిక్సర్లు), మరిజానె కాప్ (94 బంతుల్లో 114, 11 ఫోర్లు, 3 సిక్సర్లు) పోరాడినా ఆ జట్టు 321/6 వద్దే ఆగి విజయానికి 4 పరుగుల దూరంలో నిలిచిపోయింది. కీలక సమయంలో వికెట్లు కోల్పోయిన దక్షిణాఫ్రికా అందుకు మూల్యం చెల్లించుకుంది. పూజ వస్ర్తాకర్(2/54), దీప్తిశర్మ(2/56) రెండేసి వికెట్లు తీశారు. కౌర్కు ‘ప్లేయర్ ఆఫ్ ద మ్యాచ్’ దక్కింది.
1 మహిళల వన్డే క్రికెట్ చరిత్రలో నలుగురు బ్యాటర్లు సెంచరీలు చేయడం ఇదే తొలిసారి. ఈ మ్యాచ్లో మంధాన, హర్మన్ప్రీత్కౌర్, వోల్వార్డ్, కాప్ సెంచరీలు చేశారు.
1 స్వదేశంలో వన్డేల్లో భారత్కు ఇదే అత్యుత్తమ స్కోరు(325/3)
15 రెండో వన్డేలో నమోదైన సిక్స్లు. మహిళల వన్డేలో ఇదే అత్యధికం.
646 మహిళల వన్డేల్లో ఇది రెండో అత్యుత్తమ స్కోరు. 2017లో దక్షిణాఫ్రికా, ఇంగ్లండ్ మ్యాచ్లో 678 పరుగులు నమోదయ్యాయి.
సంక్షిప్త స్కోర్లు
సంక్షిప్త స్కోర్లు: భారత్: 50 ఓవర్లలో 325/3(మంధాన 136, హర్మన్ప్రీత్కౌర్ 103 నాటౌట్, మాల్బ 2/51, క్లాస్ 1/67), దక్షిణాఫ్రికా: 50 ఓవర్లలో 321/6(వోల్వార్డ్ 135 నాటౌట్, కాప్ 114, వస్ర్తాకర్ 2/54, దీప్తి 2/56)