Team India | దంబుల్లా (శ్రీలంక): మహిళల ఆసియా కప్లో డిఫెండింగ్ చాంపియన్ భారత్ వరుసగా రెండో విజయం సాధించింది. తొలి మ్యాచ్లో పాకిస్థాన్ను చిత్తుగా ఓడించిన మన అమ్మాయిలు.. ఆదివారం యూనైటెడ్ అరబ్ ఎమిరేట్స్ (యూఏఈ)తో జరిగిన మ్యాచ్లోనూ 78 పరుగుల భారీ తేడాతో గెలిచి సెమీస్ బెర్తు ఖాయం చేసుకున్నారు. మ్యాచ్లో మొదట బ్యాటింగ్ చేసిన భారత్ నిర్ణీత 20 ఓవర్లలో 5 వికెట్ల నష్టానికి 201 పరుగుల రికార్డు స్కోరు చేసింది. కెప్టెన్ హర్మన్ప్రీత్ కౌర్ (47 బంతుల్లో 66, 7 ఫోర్లు, 1 సిక్స్), యువ వికెట్ కీపర్ రిచా ఘోష్ (29 బంతుల్లో 64 నాటౌట్, 12 ఫోర్లు, 1 సిక్స్) ధాటిగా ఆడటంతో ఈ ఫార్మాట్లో భారత్ 200 పరుగుల మార్కును తొలిసారిగా దాటింది.
తన టీ20 కెరీర్లో తొలి అర్ధ శతకం సాధించిన రిచా బౌండరీలతో విరుచుకుపడింది. 26 బంతుల్లోనే ఫిఫ్టీ పూర్తిచేసిన ఆమె ఈ మ్యాచ్లో 64 పరుగులు చేస్తే అందులో 54 పరుగులు ఫోర్లు, సిక్స్ రూపంలో వచ్చినవే.ఈ ఇన్నింగ్స్తో రిచా మహిళల ఆసియా కప్లో అర్ధ శతకం సాధించిన తొలి భారత వికెట్ కీపర్గా రికార్డులకెక్కింది. అనంతరం ఛేదనలో యూఏఈ 20 ఓవర్లకు 7 వికెట్లు కోల్పోయి 123 పరుగులే చేయగలిగింది. ఆ జట్టులో కవిషా (32 బంతుల్లో 40, 3 ఫోర్లు, 1 సిక్స్) టాప్ స్కోరర్. కెప్టెన్ రోహిత్ ఒజా (38) రాణించింది. దీప్తి శర్మ (2/23) రాణించగా రేణుకా, తనూజా, రాధా యాదవ్ తలా ఓ వికెట్ తీశారు. ఇక ఈ టోర్నీలో భారత్ తమ తదుపరి మ్యాచ్ను మంగళవారం నేపాల్తో ఆడనుంది.