Team India | దంబుల్లా (శ్రీలంక): మహిళల ఆసియా కప్లో భారత్ ఘనంగా బోణీ కొట్టింది. డిఫెండింగ్ చాంపియన్గా బరిలోకి దిగిన టీమ్ఇండియా.. శుక్రవారం దంబుల్లా వేదికగా చిరకాల ప్రత్యర్థి పాకిస్థాన్తో జరిగిన మ్యాచ్లో 7 వికెట్ల తేడాతో దాయాదిని చిత్తుచేసింది. టాస్ గెలిచి మొదట బ్యాటింగ్కు దిగిన పాకిస్థాన్ 19.2 ఓవర్లలో 108 పరుగులకే ఆలౌట్ అయింది. దీప్తి శర్మ (3/20), రేణుకా సింగ్ (2/14), శ్రేయాంక పాటిల్ (2/14) సమిష్టిగా రాణించడంతో పాక్ బ్యాటర్లు విలవిల్లాడారు.
ఆ జట్టులోసిద్రా అమీన్ (25) టాప్ స్కోరర్. అనంతరం స్వల్ప ఛేదనను భారత్ 14.1 ఓవర్లలో మూడు వికెట్లు మాత్రమే కోల్పోయి పూర్తి చేసింది. ఓపెనర్లు స్మృతి మంధాన (31 బంతుల్లో 45, 9 ఫోర్లు), షఫాలీ వర్మ (29 బంతుల్లో 40, 6 ఫోర్లు, 1 సిక్సర్) ధాటిగా ఆడి తొలి వికెట్కు 85 పరుగులు జోడించి విజయాన్ని ఖాయం చేశారు. దీప్తికి ‘ప్లేయర్ ఆఫ్ ద మ్యాచ్’ అవార్డు లభించింది. ఆసియా కప్లో భాగంగా పాకిస్థాన్పై 7 టీ20లలో భారత్కు ఇది ఆరో విజయం కావడం గమనార్హం.