Bangladesh Protests | ఈ ఏడాది అక్టోబర్ నుంచి జరగాల్సి ఉన్న మహిళల టీ20 ప్రపంచకప్నకు బంగ్లాదేశ్ ఆతిథ్యాన్ని నిలుపుకుంటుందా? లేక కోల్పోతుందా? అనేది ఆసక్తికరంగా మారింది. గత రెండు వారాలుగా దేశంలో జరుగుతున్న ఆందోళనలే ఇందుకు కారణం. బంగ్లాదేశ్ విముక్తి పోరాటంలో పాల్గొన్నఅమరవీరుల వారసులకు ప్రభుత్వ ఉద్యోగాలలో 30 శాతం కోటా ఇవ్వాలని ప్రతిపాదిస్తున్న షేక్ హసీనా ప్రభుత్వంపై దేశవ్యాప్తంగా విద్యార్థులు ఆందోళనబాటపట్టడంతో ఆ దేశం అట్టుడుకుతోంది. అధికారిక లెక్కల ప్రకారమే ఇప్పటికే అక్కడ 150 మందికి పైగా మరణించగా సుమారు వెయ్యి మంది దాకా జైలుపాలైనట్టు తెలుస్తోంది.
రోజురోజుకూ ఆందోళనలు ఉధృతమవుతున్న నేపథ్యంలో మరో రెండు నెలల్లో జరగాల్సి ఉన్న మహిళల ప్రపంచకప్పై నీలిమబ్బులు కమ్ముకున్నాయి. ఇదే విషయం తాజాగా కొలంబో (శ్రీలంక) వేదికగా జరుగుతున్న ఐసీసీ వార్షిక సమావేశంలోనూ చర్చకు వచ్చినట్టు తెలుస్తోంది. ఇదే విషయమై ఐసీసీ ప్రతినిధి ఒకరు క్రిక్బజ్తో మాట్లాడుతూ.. ‘మేం అక్కడి పరిస్థితులను నిశితంగా పరిశీలిస్తున్నాం. అయితే ప్రపంచకప్ జరిగేందుకు ఇంకా రెండు నెలల సమయముంది. అప్పటివరకు పరిస్థితులు అదుపులోకి వస్తాయని ఆశిస్తున్నాం..’అని తెలిపాడు.
#BREAKING ⚡🇧🇩 – The Bangladesh government imposes a curfew and deploys the army after the protests that took place in the country, killing at least 105 people
Footage of recent violent student uprisings.#SaveBangladeshiStudents pic.twitter.com/OdzQA3sciX
— MH Chronicle (@MHNewsDaily) July 19, 2024
అక్టోబర్ 20 నుంచి మొదలుకావాల్సి ఉన్న మహిళల పొట్టి ప్రపంచకప్లో 10 దేశాలు పాల్గొననున్నాయి. 18 రోజుల పాటు సిల్హెట్ లోని రెండు వేదికలలో జరగాల్సి ఉన్న ఈ మెగా టోర్నీలో పది జట్లు మొత్తం 23 మ్యాచ్లు ఆడాల్సి ఉంది. కొద్దిరోజుల క్రితమే అమెరికా/వెస్టిండీస్ వేదికలుగా ముగిసిన పురుషుల టీ20 ప్రపంచకప్లో భాగంగా అమెరికాలో మ్యాచ్లు నిర్వహించడంతో సుమారు రూ. 160 కోట్ల నష్టాన్ని మూటగట్టుకున్న ఐసీసీ తాజాగా బంగ్లాదేశ్లో ఆందోళనలతో కూడా అలాంటిది పునరావృతం కావొద్దని కోరుకుంటున్నది.