MI vs LSG : ఐపీఎల్ పదిహేడో సీజన్లో ప్లే ఆఫ్స్ రేసు నుంచి వైదొలిగిన ముంబై ఇండియన్స్(Mumbai Indians) ఆఖరి మ్యాచ్కు సిద్ధమైంది. వాంఖడే వేదికగా లక్నో సూపర్ జెయింట్స్(Lucknow Super Giants)తో హార్దిక్ పాండ్యా సేన అమీతుమీ తేల్చుకోనుంది. టాస్ గెలిచిన పాండ్యా బౌలింగ్ తీసుకున్నాడు.
లక్నో జట్టు రెండు మార్పులతో ఆడుతుడంగా ముంబై కీలక ఆటగాళ్లు రోహిత్ శర్మ, పేసర్ బుమ్రా ఆడడం లేదు. దాంతో ఈ సీజన్లో అర్జున్ టెండూల్కర్ తొలిసారి తుది జట్టులోకి ఎంపికయ్యాడు. ప్లే ఆఫ్స్ ఆశలు ఆవిరైన వేళ విజయంతో మెగా టోర్నీని ముగించాలని ఇరుజట్లు పట్టుదలతో ఉన్నాయి.
ముంబై తుది జట్టు : ఇషాన్ కిషన్, నమాన్ దిర్, సూర్యకుమార్ యాదవ్, డెవాల్డ్ బ్రెవిస్, హార్దిక్ పాండ్యా(కెప్టెన్), నేహల్ వధేరా, పీయూష్ చావ్లా, రొమారియో షెపర్డ్, అన్షుల్ కంబోజ్, నువాన్ తుషార, అర్జున్ టెండూల్కర్.
లక్నో తుది జట్టు : కేఎల్ రాహుల్(కెప్టెన్), దేవ్దత్ పడిక్కల్, మార్కస్ స్టోయినిస్, దీపక్ హుడా, నికోలస్ పూరన్, అయుశ్ బదొని, కృనాల్ పాండ్యా, అర్షద్ ఖాన్, మ్యాట్ హెన్రీ, రవి బిష్ణోయ్, మొహ్సిన్ ఖాన్.
ఈ సీజన్లో హార్దిక్ పాండ్యా సారథ్యంలో ముంబై ఆట అధ్వాన్నంగా మారింది. రోహిత్ శర్మ కెప్టెన్సీలో ఐదుసార్లు ఐపీఎల్ ట్రోఫీ నెగ్గిన ముంబై బ్యాటింగ్, బౌలింగ్, ఫీల్డింగ్.. అన్ని విభాగాల్లో విఫలమైంది. 13 మ్యాచుల్లో విజయాలతో ఇప్పటికే ప్లే ఆఫ్స్ నుంచి తప్పుకుంది. ఇక .. లక్నో సూపర్ జెయింట్స్ చేజేతులా ప్లే ఆఫ్స్ చాన్స్ పోగొట్టుకుంది. 12 పాయింట్లతో ఉన్న లక్నో ఈ మ్యాచ్ గెలిచినా రన్రేటులో చెన్నై సూపర్ కింగ్స్ను వెనక్కి నెట్టడం కష్టం. దాంతో, వాంఖడేలో ఎవరు గెలిచినా టాప్ 4పై ఏమంత ప్రభావం ఉండదు.