Gurukula students | హైదరాబాద్, జూలై12 (నమస్తే తెలంగాణ): తెలంగాణ సోషల్ వెల్ఫేర్ గురుకుల విద్యార్థులు తమ ప్రతిభతో మరోసారి అరుదైన అవకాశాన్ని అందిపుచ్చుకున్నారు. ప్రపంచస్థాయి చెస్ పోటీల్లో పాల్గొనబోతున్నారు. దేశవ్యాప్తంగా 9మంది విద్యార్థులు ఎంపికకాగా, అందులో తెలంగాణ సోషల్ వెల్ఫేర్ గురుకులానికి చెందిన వారే 5 ఉండడం గర్వకారణం. ఇంటర్నేషనల్ చెస్ ఫెడరేషన్ ఆధ్వర్యంలో వరల్డ్ స్కూల్ ర్యాపిడ్ అండ్ బ్లిట్జ్ చెస్ చాంపియన్షిప్ పోటీలు ఆగస్టు 1 నుంచి 8వ తేదీ వరకు తాష్కెంట్(ఉజ్బెకిస్థాన్)లో జరుగనున్నాయి.
అండర్ 9, 11, 13, 15, 17 విభాగంలో నిర్వహించనున్న ఈ ప్రపంచ చెస్ పోటీల్లో పాల్గొనేందుకు దేశవ్యాప్తంగా 9మంది విద్యార్థులు అర్హత సాధించారు. రాజ్కుమార్(ఇచ్చోడ), కట్రావత్ జగదీశ్(లింగాల), గణేశ్(నారాయణఖేడ్), మన్విత్(షేక్పేట), శ్రీలాస్య(తొర్రూర్) ఉన్నారు. విద్యార్థులు ప్రపంచ పోటీలకు ఎంపిక కావడంపై సొసైటీ కార్యదర్శి వర్షిణి హర్షం వ్యక్తం చేశారు. ప్రపంచ టోర్నీలో విద్యార్థులు సత్తాచాటాలని ఆమె ఆకాంక్షించారు.