కుర్రాళ్లు కదంతొక్కారు! సీనియర్ల గైర్హాజరీలో అవకాశాలను అందిపుచ్చుకుంటూ జింబాబ్వేతో మరో మ్యాచ్ మిగిలుండగానే టీ20 సిరీస్ను ఒడిసిపట్టుకున్నారు. ఏకపక్షంగా సాగిన నాలుగో టీ20 పోరులో టీమ్ఇండియా 10 వికెట్ల తేడాతో ఘన విజయం సాధించింది. జింబాబ్వే నిర్దేశించిన 153 పరుగుల లక్ష్యాన్ని యువభారత్ వికెట్ కోల్పోకుండా 16వ ఓవర్లోనే విజయాన్నందుకుంది. ఓపెనర్లు యశస్వి జైస్వాల్ ధనాధన్ ఇన్నింగ్స్తో విజృంభిస్తే..గిల్ కెప్టెన్ ఇన్నింగ్స్తో ఆకట్టుకున్నాడు. తొలుత బౌలర్ల సమిష్టి ప్రదర్శనతో జింబాబ్వే 152 పరుగులు చేసింది. సిరీస్లో ఇరు జట్ల మధ్య చివరిదైన ఐదో టీ20 మ్యాచ్ నేడు జరుగనుంది.
హరారే: జింబాబ్వేతో ఐదు మ్యాచ్ల సిరీస్ను భారత్ తమ ఖాతాలో వేసుకుంది. మరో మ్యాచ్ మిగిలుండగానే సిరీస్లో టీమ్ఇండియా 3-1తో ఆధిక్యంలో నిలిచింది. శనివారం జరిగిన నాలుగో టీ20లో భారత్ 10 వికెట్ల తేడాతో జింబాబ్వేపై భారీ విజయం సాధించింది. తొలుత జింబాబ్వే నిర్ణీత 20 ఓవర్లలో 7 వికెట్ల నష్టానికి 152 పరుగులు చేసింది. కెప్టెన్ సికిందర్ రజా(46) టాప్ స్కోరర్గా నిలువగా, మరుమని(32) ఆకట్టుకున్నాడు. ఖలీల్ అహ్మద్(2/32) రెండు వికెట్లు తీయగా, దేశ్పాండే, సుందర్, అభిషేక్, దూబే ఒక్కో వికెట్ తీశారు.
ఆ తర్వాత లక్ష్యఛేదనకు దిగిన టీమ్ఇండియా 15.2 ఓవర్లలో వికెట్ నష్టపోకుండా విజయాన్నందుకుంది. ఓపెనర్లు యశస్వి జైస్వాల్(53 బంతుల్లో 93 నాటౌట్, 13ఫోర్లు, 2సిక్స్లు), శుభ్మన్ గిల్(39 బంతుల్లో 58 నాటౌట్, 6ఫోర్లు, 2సిక్స్లు) అర్ధసెంచరీలతో విజృంభించారు. పసలేని జింబాబ్వే బౌలింగ్ను చీల్చిచెండాడుతూ ఈ యువ ద్వయం జట్టుకు అలవోక విజయాన్ని అందించారు. ముఖ్యంగా ఆకాశమే హద్దుగా చెలరేగిన జైస్వాల్కు ‘మ్యాన్ ఆఫ్ ద మ్యాచ్’ దక్కింది.
జైస్వాల్, గిల్ ధనాధన్: జింబాబ్వే నిర్దేశించిన లక్ష్యఛేదనలో యువ ఓపెనర్లు జైస్వాల్, గిల్ ఆది నుంచే తమదైన దూకుడు కనబరిచారు. గరవ వేసిన ఇన్నింగ్స్ తొలి ఓవర్లోనే జైస్వాల్ మూడు ఫోర్లతో దంచుడు మొదలుపెట్టాడు. ఆ తర్వాత తన వంతు అన్నట్లు గిల్ కూడా బ్యాటుకు పనిచెప్పాడు. చతార వేసిన ఇన్నింగ్స్ మూడో ఓవర్లో జైస్వాల్ చుక్కలు చూపెట్టాడు. నాలుగు ఫోర్లు 16 పరుగులు పిండుకున్నాడు. దీంతో నాలుగో ఓవర్లోనే టీమ్ఇండియా 50 పరుగుల మార్క్ అందుకుంది.
పవర్ప్లే ముగిసే సరికి భారత్ 61 పరుగులు చేసింది. బౌలింగ్ మార్పుగా వచ్చిన కెప్టెన్ రజాను కూడా జైస్వాల్ అరుసుకున్నాడు. ఈ క్రమంలో 29 బంతుల్లోనే జైస్వాల్ అర్ధసెంచరీ మార్క్ అందుకున్నాడు. ఏ దశలోనూ వెనుకకు తగ్గని ఈ జోడీ బౌలర్ ఎవరన్నది లెక్కచేయకుండా ముందుకు సాగింది. ఫరజ్ అక్రమ్ వేసిన 10వ ఓవర్లో గిల్ మూడు ఫోర్లు కొట్టి ఇన్నింగ్స్ను టాప్గేర్లో తీసుకెళ్లాడు. వీరిద్దరిని విడదీసేందుకు కెప్టెన్ రజా ఎన్ని రకాలుగా ప్రయత్నం చేసినా లాభం లేకపోయింది. వీరి దూకుడైన బ్యాటింగ్తో లక్ష్యం అంతకంతకూ కరుగుతూ వచ్చింది. ఆఖర్లో ముజర్బనీ బౌలింగ్లో ఫోర్తో జైస్వాల్ గెలుపు లాంఛనాన్ని పూర్తి చేశాడు.
రజా మెరిసినా: తొలుత బ్యాటింగ్కు దిగిన జింబాబ్వేకు మెరుగైన శుభారంభం దక్కింది. ఓపెనర్లు వెస్లి మెద్వెరె(25), మరుమని(32) టీమ్ఇండియా బౌలర్లను సమర్థంగా ఎదుర్కొన్నారు. ఖలీల్ అహ్మద్ మూడో ఓవర్లో మరుమని ఇచ్చిన దూబే జారవిడువడంతో బతికిపోయాడు. ఇదే అదనుగా చెలరేగడంతో జింబాబ్వే తొలి ఆరు ఓవర్లు ముగిసే సరికి వికెట్ నష్టపోకుండా 44 పరుగులు చేసింది.
టీ20ల్లో భారత్పై తొలి వికెట్కు జింబాబ్వే అత్యుత్తమ భాగస్వామ్యాన్ని నమోదు చేసుకుంది. ప్రమాదకరంగా మారుతున్న ఈ జోడీని మరుమనిని ఔట్ చేయడం ద్వారా అభిషేక్ విడగొట్టాడు. మరో ఎండ్లో బౌలింగ్కు వచ్చిన దూబే..వెస్లీని ఔట్ చేసి భారత్ను పోటీలోకి తీసుకొచ్చాడు. ఈ క్రమంలో ఇన్నింగ్స్ బాధ్యతను రజా తీసుకున్నాడు. అంతర్జాతీయ టీ20ల్లో రెండు వేల పరుగుల మార్క్ దాటేసిన రజా..టీమ్ఇండియా బౌలర్లను నిలువరించాడు. ఓవైపు సహచరులు నిష్క్రమిస్తున్నా..రజా వెనుకకు తగ్గలేదు. చివరకు దేశ్పాండే బౌలింగ్లో గిల్కు క్యాచ్ ఇచ్చి వెనుదిరిగాడు. ఖలీల్ 20వ ఓవర్లో రెండు వికెట్లు తీసి ఐదు పరుగులకే పరిమితం కావడంతో జింబాబ్వే ఇన్నింగ్స్కు తెరపడింది.
జింబాబ్వే: 20 ఓవర్లలో 152/7 (రజా 46, మరుమని 32, ఖలీల్ 2/32, అభిషేక్ 1/20),
భారత్: 15.2 ఓవర్లలో 156/0 (జైస్వాల్ 93 నాటౌట్, గిల్ 58 నాటౌట్)