T20 World Cup | న్యూయార్క్: పొట్టి ప్రపంచకప్లో సంచలనాల పర్వం కొనసాగుతోంది. కొద్దిగంటల క్రితమే పాకిస్థాన్ను అమెరికా చిత్తుచేసిన విషయం మరువకముందే మరో ‘పసికూన’ కెనడా.. అంతర్జాతీయ క్రికెట్లో తమకంటే మెరుగైన ఐర్లాండ్కు షాకిచ్చింది. గ్రూప్-ఏలో ఉన్న ఈ రెండు జట్ల మధ్య శుక్రవారం నసావు క్రికెట్ స్టేడియం (న్యూయార్క్) వేదికగా జరిగిన లో స్కోరింగ్ థ్రిల్లర్లో కెనడా 12 పరుగుల తేడాతో ఐర్లాండ్ను ఓడించింది.
కెనడా నిర్దేశించిన 138 పరుగుల స్వల్ప ఛేదనలో ఐర్లాండ్.. 20 ఓవర్లలో 125/7 వద్దే ఆగిపోయి ఓటమి వైపున నిలిచింది. అడైర్ (24 బంతుల్లో 34, 3 ఫోర్లు, 1 సిక్సర్), డాక్రెల్ (23 బంతుల్లో 30 నాటౌట్, 2 ఫోర్లు, 1 సిక్సర్) పోరాటం ఆ జట్టును కాపాడలేకపోయింది. కెనడాబౌలర్లు సమిష్టిగా రాణించారు. టాస్ ఓడి మొదట బ్యాటింగ్ చేసిన కెనడా.. 20 ఓవర్లలో 7 వికెట్ల నష్టానికి 137 పరుగులు చేసింది. ‘మ్యాన్ ఆఫ్ ది మ్యాచ్’ నికోలస్ కిర్టన్ (35 బంతుల్లో 49, 3 ఫోర్లు, 2 సిక్సర్లు), శ్రేయస్ మొవ్వ (36 బంతుల్లో 37, 3 ఫోర్లు) ఆదుకోవడంతో ఆ జట్టు గౌరవప్రదమైన స్కోరు సాధించింది. టీ20 వరల్డ్ కప్లో కెనడాకు ఇదే తొలి విజయం.
కెనడా: 20 ఓవర్లలో 137/7 (నికోలస్ 49, శ్రేయస్ 37, మెక్కార్తి 2/24, క్రెయిగ్ 2/32).
ఐర్లాండ్: 20 ఓవర్లలో 125/7 (అడైర్ 34, డాక్రెల్ 30 నాటౌట్, గోర్డాన్ 2/16, డిల్లాన్ 2/18)