Anshuman Gaekwad | ఢిల్లీ: ఏడాదికాలంగా క్యాన్సర్తో పోరాడుతున్న భారత మాజీ క్రికెటర్ అన్షుమన్ గైక్వాడ్కు బీసీసీఐ కోటి రూపాయల ఆర్థిక సాయం ప్రకటించింది. ఈ మేరకు కార్యదర్శి జై షా బీసీసీఐ అధికారులను ఆదేశించినట్టు బోర్డు ఓ ప్రకటనలో తెలిపింది. ‘క్యాన్సర్ బారినపడ్డ భారత మాజీ క్రికెటర్ అన్షుమన్కు తక్షణ సాయం కింద కోటి రూపాయలను విడుదల చేయాలని కార్యదర్శి జై షా ఆదేశించారు. ఆయన కుటుంబసభ్యులతోనూ జై షా మాట్లాడారు. గైక్వాడ్ కుటుంబానికి బీసీసీఐ అండగా ఉంటుంది’ అని ప్రకటనలో పేర్కొంది.
బ్లడ్ క్యాన్సర్తో లండన్లోని కింగ్స్ కాలేజీ హాస్పిటల్లో చికిత్స పొందుతున్న గైక్వాడ్కు తన మాజీ సహచర ఆటగాళ్లు కపిల్దేవ్, గవాస్కర్, సందీప్ పాటిల్ వంటి పలువురు సాయమందిస్తున్నారు. ఈ విషయాన్ని సందీప్ పాటిల్ ముందుగా బీసీసీఐ దృష్టికి తీసుకువచ్చాడు. 1975 నుంచి 1987 దాకా భారత్ తరఫున 40 టెస్టులు, 15 వన్డేలు ఆడిన గైక్వాడ్.. టీమ్ఇండియాకు రెండుమార్లు హెడ్కోచ్గా కూడా పనిచేశారు.