మహిళల ప్రీమియర్ లీగ్(డబ్ల్యూపీఎల్)లో ఢిల్లీ క్యాపిటల్స్ గెలుపు జోరు దిగ్విజయంగా కొనసాగుతున్నది. ప్రత్యర్థి ఎవరైనా గెలుపే లక్ష్యంగా దూసుకెళుతున్న ఢిల్లీ..గుజరాత్ జెయింట్స్ను మట్టికరిపించి టాప్లోకి దూసుకెళ్లింది. కెప్టెన్ మెగ్ ల్యానింగ్ అర్ధసెంచరీతో క్యాపిటల్స్ 163-8 స్కోరు చేసింది. మేఘనాసింగ్ నాలుగు వికెట్లతో రాణించింది. లక్ష్యఛేదనలో గుజరాత్ 138-8 స్కోరుకు పరిమితమైంది. జొనాసెన్, రాధా యాదవ్..గుజరాత్ పతనాన్ని శాసించారు. ఆడిన నాలుగు మ్యాచ్ల్లో ఓడిన గుజరాత్ పట్టికలో ఆఖరి స్థానంలో కొట్టుమిట్టాడుతున్నది.
బెంగళూరు: మహిళల ప్రీమియర్ లీగ్(డబ్ల్యూపీఎల్)లో ఢిల్లీ క్యాపిటల్స్ అదరగొడుతున్నది. మ్యాచ్ మ్యాచ్కు మరింత పరిణతి సాధిస్తూ వరుస విజయాలు ఖాతాలో వేసుకుంటున్నది. ఆదివారం చిన్నస్వామి స్టేడియం వేదికగా జరిగిన పోరులో ఢిల్లీ 25 పరుగుల తేడాతో గుజరాత్ జెయింట్స్పై అద్భుత విజయం సాధించింది. తొలుత ఢిల్లీ నిర్ణీత 20 ఓవర్లలో 163-8 స్కోరు చేసింది. కెప్టెన్ మెగ్ ల్యానింగ్(41 బంతుల్లో 55, 6ఫోర్లు, సిక్స్) అర్ధసెంచరీతో ఆకట్టుకుంది. మేఘనాసింగ్(4-37) నాలుగు వికెట్లతో ఆకట్టుకుంది. ఆ తర్వాత లక్ష్యఛేదనకు దిగిన గుజరాత్..138-8 స్కోరుకు పరిమితమైంది. అశ్లే గార్డ్నర్(40) ఫర్వాలేదనిపించగా, మిగతా బ్యాటర్లు ఘోరంగా విఫలమయ్యారు. జెస్ జొనాసెన్(3-22), రాధా యాదవ్(3-20) గుజరాత్ను పడగొట్టడంలో కీలకమయ్యారు. జొనాసెన్కు ‘ప్లేయర్ ఆఫ్ మ్యాచ్’ దక్కింది. ఆడిన నాలుగు మ్యాచ్ల్లో మూడు విజయాలు, ఒక ఓటమితో ఢిల్లీ(6) టాప్లో కొనసాగుతుండగా, గుజరాత్ నాలుగింట నాలుగు ఓటములతో ఆఖర్లో ఉంది.
ల్యానింగ్ ఇన్నింగ్స్: ఢిల్లీ బ్యాటర్లు మెగ్ ల్యానింగ్, షెఫాలీ వర్మ ఆది నుంచే తమదైన దూకుడు ప్రదర్శించారు. కన్వర్ వేసిన ఇన్నింగ్స్ తొలి ఓవర్లో షెఫాలీ ఫోర్, సిక్స్తో తన ఉద్దేశమేంటో చెప్పకనే చెప్పింది. అయితే మేఘనాసింగ్ వేసిన మూడో ఓవర్లో భారీ షాట్కు ప్రయత్నించిన షెఫాలీ..స్వేర్ లెగ్లో వోల్వార్డ్ చేతికి చిక్కింది. దీంతో షెఫాలీ స్వల్ప స్కోరుకే వెనుదిరిగింది. ఈ తరుణంలో ల్యానింగ్ ఇన్నింగ్స్ బాధ్యతను భుజాన వేసుకుంది. ల్యానింగ్, క్యాప్సె దూకుడైన బ్యాటింగ్తో ఢిల్లీ పవర్ ప్లే ముగిసే సరికి వికెట్ నష్టానికి 51 పరుగులు చేసింది. మేఘన మరోమారు దెబ్బతీసింది. ఈసారి కాప్సెను ఔట్ చేసి గుజరాత్ శిబిరంలో ఆనందం నింపింది. ఓవైపు సహచరులు నిష్క్రమిస్తున్నా..ఒత్తిడికి లోనుకాని ల్యానింగ్.. ఇన్నింగ్స్ను పునర్నిర్మించేందుకు ప్రయత్నించింది. వీలు కుదిరినప్పుడల్లా చెత్త బంతులను బౌండరీలకు తరలించిన ల్యానింగ్..మంచి బంతులను గౌరవిస్తూ ముందుకుసాగింది. మేఘనాసింగ్ 13వ ఓవర్లో వరుస బంతుల్లో బౌండరీలు బాది ఆర్ధసెంచరీ పూర్తి చేసుకున్న ల్యానింగ్..హేమలతకు క్యాచ్ ఇచ్చి వెనుదిరిగింది. ఆ తర్వాత వచ్చిన బ్యాటర్లు పెద్దగా ఆకట్టుకోలేకపోవడంతో ఢిల్లీకి భారీ స్కోరు సాధ్యపడలేదు.
గుజరాత్ పడుతూలేస్తూ: నిర్దేశిత లక్ష్యఛేదనలో గుజరాత్ బ్యాటింగ్ పడుతూలేస్తూ సాగింది. అరంగేట్రం బౌలర్ టిటాస్ సాధు ఇన్నింగ్స్ తొలి ఓవర్ను మెయిడిన్ చేయగా, రెండో ఓవర్లో పాండే బౌలింగ్లో లౌరా వోల్వార్డ్(0) సున్నా పరుగులకే ఔట్ అయ్యింది. వచ్చి రావడంతో లిచ్ఫీల్డ్ వరుస బౌండరీలతో విరుచుకుపడగా, బేత్ మూనీ కూడా దూకుడు ప్రదర్శించింది. అయితే స్పిన్నర్ జొనాసెన్..మూనీతో పాటు లిచ్ఫీల్డ్ను బౌట్ చేసి మరోమారు గుజరాత్ను కష్టాల్లోకి నెట్టింది. ఇక్కణ్నుంచి ఏ దశలోనూ కోలుకోని గుజరాత్..జొనాసెన్, రాధా యాధవ్ ధాటికి వరుస విరామాల్లో వికెట్లు కోల్పోయి మూల్యం చెల్లించుకుంది.
సంక్షిప్త స్కోర్లు: ఢిల్లీ: 20 ఓవర్లలో 163-8(ల్యానింగ్ 55, క్యాప్సె 27, మేఘనాసింగ్ 4-37, గార్డ్నర్ 2-37), గుజరాత్: 138-8(గార్డ్నర్ 40, లిచ్ఫీల్డ్ 15, రాధయాదవ్ 3-20, జొనాసెన్ 3-22)