Bhaskar Halami | చిన్నప్పుడు తినడానికి తిండి లేక.. అడవి బియ్యం పిండితో అంబలి (గంజినీళ్లు)తో కడుపు నింపుకున్న కుర్రాడు.. అతడి పేరు భాస్కర్ హలామీ.. మహారాష్ట్రలోని గడ్చిరోలి జిల్లాలోని కుర్కెడా తహసీల్ పరిధిలోని చిర్చడి గ్రామానికి చెందిన గిరిజన పేద కుటుంబం నుంచి వచ్చిన ఈ కుర్రాడు.. ఇప్పుడు అమెరికాలో సీనియర్ శాస్త్రవేత్తగా అందరి ప్రశంసలు అందుకుంటున్నారు. కృషి, చిత్తశుద్ధి, ధైర్య సాహసాలు ఉంటే ఎటువంటి అసాధ్యాలనైనా సుసాధ్యం చేయగలరని చెప్పడానికి భాస్కర్ హలామీ జీవితమే ఒక ఉదాహరణ.
భాస్కర్ హలామీ ఈ స్థాయికి చేరుకోవడానికి ఎన్నో అవరోధాలను దాటాల్సి వచ్చింది. చిన్నతనంలో తమ కుటుంబం పరిస్థితి చాలా దారుణంగా ఉండేదని భాస్కర్ చిన్ననాటి స్మృతులు గుర్తు చేసుకున్నారు. వర్షాలు పడక, కొద్దిపాటి పొలంలో పంటలు లేక కొన్నినెలలపాటు విప్పపూలు వండుకుని తిన్నామని చెప్పారు. అడవి బియ్యం సేకరించి.. వాటిని పిండి చేసి, దాంతో గంజినీళ్లు కాచుకుని.. తాగి కడుపు నింపుకోవాల్సి వచ్చేదన్నారు. తమ గ్రామంలో 90 శాతం మంది పరిస్థితి ఇలాగే ఉండేదన్నారు.
ప్రస్తుతం అమెరికాలోని మేరీ ల్యాండ్లో బయో ఫార్మాస్యూటికల్స్ కంపెనీ సిర్నామిక్స్ ఇంక్లో పరిశోధన- అభివృద్ధి విభాగంలో సీనియర్ శాస్త్రవేత్తగా భాస్కర్ హలామీ పని చేస్తున్నారు. ఈ సంస్థ జన్యు ఔషధాలపై పరిశోధనలు చేస్తుంది. ఆర్ఎన్ఏ తయారీ, సంశ్లేషణ అంశాలను ఆయన పరిశోధిస్తున్నారు. భాస్కర్ హలామీ.. తన గ్రామంలో మాస్టర్స్ డిగ్రీ, పీహెచ్డీ పూర్తి చేసిన తొలి వ్యక్తిగా రికార్డు సాధించారు.
చిర్చాడిలో 400-500 కుటుంబాలు నివసిస్తున్నారు. హలామీ తల్లిదండ్రులు గ్రామస్తుల ఇండ్లలో పని చేశారు. ఏడో తరగతి వరకు చదువుకున్న హలామీ తండ్రికి 100 కి.మీ. దూరంలోని కసన్సూర్ తహసీల్ పరిధిలోని ఓ పాఠశాలలో ఉద్యోగం వచ్చాక.. అక్కడికి తరలి వెళ్లడంలో తమ పరిస్థితులు మెరుగయ్యాయని చెప్పారు. కసన్సూర్లోని ఆశ్రమ పాఠశాలలో నాలుగో తరగతి వరక.. అటుపై పదో తరగతి వరరకు కేలాపూర్ ప్రభుత్వ విద్యానికేతన్ చదివారు. అటుపై గడ్చిరోలిలోని కాలేజీలో బీఎస్సీ.. నాగ్పూర్ ఇన్స్టిట్యూట్ ఆఫ్ సైన్స్లో కెమిస్ట్రీలో మాస్టర్ డిగ్రీ పొందారు.
2003లో నాగ్పూర్లోని ప్రతిష్ఠాత్మక లక్ష్మీ నారాయణ ఇన్స్టిట్యూట్ ఆఫ్ టెక్నాలజీలో అసిస్టెంట్ ప్రొఫెసర్గా కెరీర్ ప్రారంభించారు భాస్కర్ హలామీ. తర్వాత మహారాష్ట్ర పబ్లిక్ సర్వీస్ (ఎంపీఎస్సీ) పరీక్షలో ఉత్తీర్ణుడైనా.. భాస్కర్ దృష్టి అంతా రీసెర్చ్ పైనే ఉండేది. డీఎన్ఏ, ఆర్ఎన్ఏలపై పరిశోధన సామర్థ్యం పెంచుకున్నారు. మిషిగాన్ టెక్నాలజీ యూనివర్సిటీ నుంచి పీహెచ్డీ పట్టా అందుకున్నారు. తన తల్లిదండ్రుల వల్లే ఈ విజయం సాధించగలిగానని చెప్పారు. తన పేరెంట్స్ ఎంతో కష్టపడి తనను చదివించారన్నారు.