Billioneers Wealth | వారంతా బిలియనీర్లు.. టెక్నాలజీ రంగంలో అద్భుతాలతో సంపద సృష్టిస్తున్నారు. కానీ ఈ ఏడాదిలో 17 మంది టెక్ బిలియనీర్ల సంపద సుమారు 480 బిలియన్ల డాలర్ల మేరకు హరించుకపోయింది. అలా సంపద కోల్పోయిన వారిలో టెస్లా టూ ట్విట్టర్ అధినేత ఎలన్మస్క్, అమెజాన్ చీఫ్ జెఫ్ బెజోస్, మెటా సీఈవో మార్క్ జుకర్బర్గ్, మైక్రోసాఫ్ట్ ఫౌండర్ బిల్ గేట్స్ తదితరులు ఉన్నారు. స్టాక్ మార్కెట్లలో వారు సారధ్యం వహిస్తున్న సంస్థల మార్కెట్ క్యాపిటలైజేషన్ కొడిగట్టుకుపోయింది.
టెస్లా చీఫ్- ప్రస్తుతం ట్విట్టర్ అధినేత ఎలన్మస్క్ ఈ ఏడాది వ్యక్తిగత నికర సంపద 66.4 బిలియన్ల డాలర్లు హరించుకపోయింది. ఒక్క శుక్రవారం నాడే 7.81 బిలియన్ల డాలర్ల సంపద కోల్పోయారు. అయినా బ్లూంబర్గ్ బిలియనీర్స్ ఇండెక్స్లో ప్రపంచంలోనే అత్యంత కుబేరుడి స్థానంలో ఎలన్మస్క్ కొనసాగుతున్నారు. సోషల్ మీడియా దిగ్గజం ట్విట్టర్ను గురువారం ఎలన్మస్క్ టేకోవర్ చేసిన సంగతి తెలిసిందే.
ఇక అమెజాన్ ఫౌండర్ జెఫ్ బెజోస్ వ్యక్తిగత నికర సంపద శుక్రవారం 7.37 బిలియన్ల డాలర్లు కోల్పోయి.. బ్లూంబర్గ్ బిలియనీర్స్ జాబితాలో ఆయన్ను మూడో స్థానానికి నెట్టేసింది. ఈ ఏడాది ఇప్పటి వరకు 65.7బిలియన్ల డాలర్లు నష్టపోయారు. ఈ ఏడాది జెఫ్ బెజోస్ నికర వ్యక్తిగత సంపద 127 బిలియన్ డాలర్లుగా నిలిచింది. ప్రస్తుత త్రైమాసికంపై కంపెనీ అంచనాలు మార్కెట్ అంచనాల కంటే తక్కువగా ఉండటంతో అమెజాన్ షేర్ శుక్రవారం ఎనిమిది శాతం పతనమైంది.
మెటా ఫార్మర్లీ ఫేస్బుక్ స్టాక్ గురువారం సుమారు నాలుగోవంతు నష్టపోయింది. 2016 డిసెంబర్ నుంచి మెటా స్టాక్ అత్యంత కనిష్ట స్థాయికి పతనమైంది. మెటా సీఈవో మార్క్ జుకర్బర్గ్ నికర సంపద 11.2 బిలియన్ డాలర్లు పతనమైంది. ఈ ఏడాది ఆయన వ్యక్తిగత సంపద 87 బిలియన్ డాలర్ల కంటే ఎక్కువగా కోల్పోయారు. ఫలితంగా బ్లూంబర్గ్ బిలియనీర్స్ ఇండెక్స్లో మార్క్ జుకర్బర్గ్ ర్యాంక్ 28వ స్థానానికి పరిమితమైంది.
ఎలన్మస్క్, జెఫ్ బెజోస్, మార్క్ జుకర్బర్గ్ మాదిరిగానే మైక్రోసాఫ్ట్ కో-ఫౌండర్ బిల్ గేట్స్ ఈ ఏడాది ఆయన వ్యక్తిగత నికర సంపద 27.3 బిలియన్ డాలర్లు కోల్పోయారు. దీంతో అత్యంత బిలియనీర్ల జాబితాలో బిల్ గేట్స్ ఐదో స్థానానికి పడిపోయారు.
గూగుల్ పేరెంట్ సంస్థ అల్ఫాబెట్ కో ఫౌండర్స్ లారీ పేజ్, సెర్జెయ్ బ్రిన్ ప్రపంచంలోని టాప్-10 బిలియనీర్లలో ఒకరు. వారి నికర వ్యక్తిగత సంపద కూడా పతనమైంది. ఈ ఏడాది వారిద్దరి నికర వ్యక్తిగత సంపద 40 బిలియన్ డాలర్లు కోల్పోయారు. యూ-ట్యూబ్ యాడ్స్ ఆదాయంలో తొలిసారి ఈ ఏడాది తగ్గుముఖం పట్టడంతో అల్ఫాబెట్ షేర్ల పతనానికి కారణంగా ఉంది.
కరోనా మహమ్మారి వేళ టెక్నాలజీ సంస్థల రెవెన్యూ పైపైకి దూసుకెళ్లాయి. కానీ ప్రస్తుత ద్రవ్యోల్బణ ఒత్తిళ్లు, పెరుగుతున్న వడ్డీరేట్లతో టెక్నాలజీ సంస్థలు ఒత్తిళ్లకు గురవుతున్నాయి. వాటి డిజిటల్ యాడ్ రెవెన్యూ గ్రోత్ నెమ్మదించింది. ఫలితంగా టెక్ దిగ్గజ సంస్థలన్నీ ఖర్చులు తగ్గించుకునే పనిలో పడ్డాయి. సిబ్బందిని ఇండ్లకు పంపేందుకు పూనుకుంటున్నాయి.
ఎస్ అండ్ పీ 500 ఇండెక్స్లోని ఏడు కంపెనీల మార్కెట్ క్యాపిటలైజేషన్ 480 బిలియన్ల డాలర్లు నష్టపోయాయని వాల్స్ట్రీట్ జర్నల్ నివేదించింది. అమెజాన్, మెటా వంటి టెక్నాలజీ సంస్థల ఆదాయం, లాభాల ఫలితాలు మార్కెట్ వర్గాలను నిరాశ పర్చడంతో ఆయా సంస్థల షేర్లు కుంగిపోయాయి. ఫలితంగా టెక్ దిగ్గజ సంస్థల అధినేతల వ్యక్తిగత సంపద కూడా భారీగా పతనమైంది. ప్రపంచంలోనే అత్యంత కుబేరులు అమెరికాలో ఎక్కువగా ఉండగా, చైనా సంపన్నుడు జాక్మా వంటి వరకు ఇతర దేశాల్లో ఉన్నారు. జాక్మా ఈ ఏడాది తన వ్యక్తిగత సంపద 9.3 బిలియన్ల డాలర్లు కోల్పోయారు.