Kalki 2898 AD | కల్కి 2898ఏడీ రివ్యూ
సినిమా: కల్కి2898ఏడి
తారాగణం: ప్రభాస్, అమితాబ్ బచ్చన్, కమల్హాసన్, దీపిక పదుకొనే, దిషా పటానీ, రాజేంద్రప్రసాద్, శోభన..
దర్శకుడు: నాగ్అశ్విన్
నిర్మాత: సి.అశ్వనీదత్
నిర్మాణం: వైజయంతీమూవీస్
పాన్ఇండియా స్టార్గా మారాక ప్రభాస్ నుంచి వచ్చిన ఏ సినిమాకీ రానంత హైప్ ‘కల్కి 2898ఏడీ’కి వచ్చింది. దర్శకుడిగా నాగ్ అశ్విన్ చేసింది రెండు సినిమాలే అయినా.. రెండూ గొప్ప సినిమాలు కావడం, ప్రతిష్టాత్మక వైజయంతీమూవీస్ నుంచి వస్తున్న సినిమా కావడం, నాగ్అశ్విన్ ఎంచుకున్న కథ కావడం.. అన్నింటినీ మించి అమితాబ్, కమల్ లాంటి ఆలిండియా సూపర్స్టార్లు ఇందులో భాగం కావడం.. ఇవన్నీ ఈ సినిమా హైప్కి గల కారణాలు కావచ్చు. సినిమా ప్రమోషన్ విషయంలో కూడా వినూత్న పద్ధతుల్ని అనుసరించారు చిత్రయూనిట్. దాంతో సినిమాను ఎప్పుడు థియేటర్లో ఎక్స్పీరియన్స్ చేద్దామా? అని ప్రేక్షకులు ఆతృతగా ఎదురుచూశారు. ఆ ప్రభావం వసూళ్లపై తప్పనిసరిగా ఉంటుందని చెప్పొచ్చు. 600కోట్ల భారీ బడ్జెట్తో తెరకెక్కిన ఈ చిత్రం ప్రపంచవ్యాప్తంగా దాదాపు 800కోట్ల బిజినెస్ చేసింది. మరి అందరి అంచనాలను ‘కల్కి 2898ఏడీ’ అందుకున్నాడా? ఊహించినట్టే విజువల్ వండర్గా సినిమా ఉందా? ఈ ప్రశ్నలకు సమాధానం కావాలంటే ముందు కథలోకెళ్లాలి.
కథ
6వేల సంవత్సరాల క్రితం జరిగిన కురుక్షేత్ర సంగ్రామం చివరి అంకం నుంచి ఈ కథ మొదలవుతుంది. బ్రహ్మాస్త్ర ప్రయోగంతో ఉత్తర గర్భాన్ని విచ్ఛిన్నం చేయడానికి ప్రయత్నించాడు అశ్వత్థామ(అమితాబ్). కానీ కృష్ణపరమాత్మ బ్రహ్మాస్ర్తానికి అడ్డుపడి అపాండవం జరగకుండా అడ్డుకున్నాడు. ఈ దుశ్చర్యకు పాల్పడ్డ అశ్వత్థామను ‘మానని గాయాలతో ఇలా చావులేకుండా పడివుండు’ అని శపించాడు. అశ్వత్థామ శాపవిమోచనం అడగ్గా.. ‘ఉత్తర గర్భంలోని బిడ్డను చంపడానికి ప్రయత్నించి పాపం మూటగట్టుకున్న నువ్వు.. నా వచ్చే అవతారంలో తల్లి గర్భంలో ఉన్న నన్ను కాపాడి పుణ్యాన్ని మూటగట్టుకుంటావ్.. అప్పుడే నీకు శాపవిమోచనం’ అని కృష్ణుడు చెప్పాడు. ఇది జరిగిన ఆరువేల సంవత్సరాల తర్వాత అసలు కథ మొదలైంది.
అది 2898వ సంవత్సరం. కలి ప్రభావంతో ప్రపంచం దాదాపుగా నిర్వీర్యమైపోయింది. లక్షలకోట్ల జీవరాసులతో, పంచభూతాత్మకమైన భూమి కళావిహీనం అయ్యింది. వనరులన్నీ నిండుకున్నాయి. నదులన్నీ ఇంకిపోయాయి. ఇక భూమిపై మిగిలింది మూడే ప్రాంతాలు. కాశీ, శంబల, కాంప్లెక్స్. తిరగబడ్డ పిరమిడ్ ఆకృతిలో ఉండే కాంప్లెక్స్.. భూసారాన్నంతటినీ పీల్చి తనలో నిక్షిప్తం చేసుకుంది. దాంతో సకలసౌకర్యాలు, సంపద కాంప్లెక్స్ పరమయ్యాయి. కాంప్లెక్స్ ఆధిపత్యంపై శంబల వాసులు నిరంతరం పోరాటం చేస్తూనే ఉన్నారు. ఇ
క కాశీవాసులైతే ఎలాగైనా కాంప్లెక్స్లో చోటు కోసం ప్రయత్నిస్తున్నారు. వారిలో భైరవ(ప్రభాస్) ఒకడు. ఎలాగైనా యూనిట్స్(డబ్బు) సంపాదించి, కాంప్లెక్స్లో చోటు సంపాదించడం భైరవ లక్ష్యం. దానికోసం తప్పులు కూడా చేస్తుంటాడు. ఇక కాంప్లెక్స్ని పాలించే రాజు సుప్రీం యాస్కిన్(కమల్హాసన్). భయంకరమైన నరరూపరాక్షసుడు. అతని వయసు 200ఏళ్లు. తన రాజ్యంలో స్త్రీలు గర్భం దాల్చడం నిషిద్దం. మరోవైపు పరమాత్మ రాకకోసం అశ్వత్థామ కాశీలోని ఓ భూగర్భ దేవాలయంలో ఎదురుచూస్తున్నాడు. అలాంటి పరిస్థితుల్లో తన ప్రమేయం లేకుండా సుమతి(దీపిక పదుకొనే) అనే అమ్మాయి గర్భం దాల్చింది. ఆ గర్భంలో ఉన్నది సాక్షాత్ శ్రీమన్నారాయణుడి అవతారమైన కల్కి.
కల్కి గర్భంలోకి ప్రవేశించగానే.. భూమిపై ఊహించని మార్పులు సంభవిస్తుంటాయి. అప్పటికే భూగర్భంలో దొరికిన అర్జునుడి గాండీవం(Arjuna Weapon) యాక్టివేట్ అయ్యింది. పరమాత్మ ఆవిర్భావాన్ని ముందే గమనించిన అశ్వత్థామ జనారణ్యంలోకి అడుగుపెట్టాడు. జరుగుతున్న శకునాలను గమనించిన కాంప్లెక్స్ దానికి కారణమైన సుమతి గర్భస్థశిశువును చంపడానికి ప్రయత్నాలు మొదలుపెట్టింది. ఆ తల్లి గర్భంలోని దేవదేవుడ్ని అశ్వత్థామ కాపాడగలిగాడా? యూనిట్స్ సంపాదించి కాంప్లెక్స్లో స్థానం సంపాదించాలనే భైరవ కోరిక నిజమైందా? అసలు ‘కల్కి’ అవరించాడా? ఈ ప్రశ్నలకు సమాధానమే మిగతా కథ.
విశ్లేషణ
తెలుగు సినిమా చరిత్రలో వచ్చిన వినూత్న ప్రయోగం ఇది. మూడు గంటలపాటు ప్రేక్షకుడికి హాలీవుడ్ సినిమాను చూస్తున్న ఎక్స్పీరియన్స్ని అందించాడు దర్శకుడు నాగ్అశ్విన్. వందల సంవత్సరాల తర్వాత టెక్నాలజీని తెరపై చూపిస్తూ.. మరోవైపు మన పురాణాల్లోని పాత్రల్ని ఈ కథలో ఇన్వాల్వ్ చేస్తూ ఓ కొత్త అనుభూతిని అందించాడు. ‘కల్కి 2898ఏడీ’ చూస్తుంటే తెలుగు సినిమా చూస్తున్నంట్టుండదు. హాలీవుడ్ సినిమా చేస్తున్న ఫీలింగే కలుగుతుంది. అంత గొప్ప టెక్నాలజీని ఇందులో చూడొచ్చు.
సినిమా చూస్తుంన్నతసేపు ‘అవేంజర్స్’, ‘అవతార్ ‘టెర్మినేటర్’ సినిమాలు గుర్తొస్తాయి. ఆ స్థాయి సాంకేతికత ఇందులో చూడొచ్చు. అయితే.. హాలీవుడ్ సినిమాను ప్రేరణగా తీసుకొని భారతీయ సినిమా తీయడం తప్పుకాదు. భారతీయ కథతో హాలీవుడ్ సినిమా తీయడం తప్పు. అలా చేయాలన్నా సంస్కృతి సహకరించదు. ‘కల్కి’ సినిమా విషయంలో అదే జరిగింది.
పైగా ఈ కథ రెండు భాగాలుగా చెప్పేది కాదనేది పలువురి అభిప్రాయం. కేవలం రెండు భాగాలుగా చేయడానికే అవసరంలేని కథనాన్ని, అసంబద్ధమైన సన్నివేశాలను చొప్పించారని పలువురు అభిప్రయపడుతున్నారు. దీనివల్ల సినిమా కాస్త ల్యాగ్ అనిపిస్తుంది. ముఖ్యంగా ప్రథమార్థమంతా హాలీవుడ్ తరహా భారీతనాన్ని చూపించుకోడానికే సరిపోయింది. దానికితోడు భైరవ కామెడీ సీన్స్ పంటికింద రాళ్లులా అనిపిస్తాయి. కాశీ, శంబల, కాంప్లెక్స్ సినేరియా, యూనిట్స్ కోసం హీరో సాహసాలు, అర్థంలేని కామెడీ సీన్స్.. ప్రథమార్థం మొత్తం ఇదే.
ఇక ద్వితీయార్థం అసలు కథలోకెళ్తాం. దీపిక పదుకొనే నటించిన సుమతి పాత్ర గర్భవతి అయినప్పట్నుంచి, ఆ బిడ్డను కాపాడటానికి అశ్వత్థామ చేసే పోరాటాలు, సుమతిని కాంప్లెక్స్ అప్పజెప్పి ఎలాగైనా డబ్బు గడించాలనే భైరవ ప్రయత్నాలు.. ఇవన్నీ ఇంట్రస్ట్గా అనిపిస్తాయి. ఈ నేపథ్యంలో వచ్చే పోరాటాలు హాలీవుడ్ సినిమాలకు ఏ మాత్రం తగ్గవ్. ఈ కథనంలో మరో విశేషం ఏంటంటే.. ప్రభాస్ పోషించిన భైరవ పాత్రను కర్ణుడి అవతారంగా చూపించాడు నాగ్అశ్విన్. ఈ విషయాన్ని చివర్లో రివీల్ చేశాడు.
కర్ణుడు కురుసామ్రాజ్యంలో స్థానంకోసం ఎలాగైతే తాపత్రయపడ్డాడో, ఇందులో భైరవ కూడా కాంప్లెక్స్లో స్థానం కోసం తాపత్రయపడుతూ ఉంటాడు. అందుకోసం కర్ణుడి మాదిరిగా తప్పులు కూడా చేస్తుంటాడు. ఇదంతా సింబాలిక్గా చూపించాడని చెప్పొచ్చు. అయితే.. కల్కి ఆగమనాన్ని, ఆయన చేసే దుష్టసంహారాన్ని చూడటానికి థియేటర్లలోకి వచ్చే ప్రేక్షకులకు ఈ సినిమా నిరాశనే మిగుల్చుతుంది. ఇప్పటివరకూ చూసింది ట్రైలర్ మాత్రమే.. అసలు సినిమా ముందుంది అని చెప్పేలా సినిమా సాగింది. కల్కి జననం.. పోరాటం అంతా రెండో పార్ట్లోనే అని చెప్పకనే చెప్పాడు దర్శకుడు నాగ్అశ్విన్. ముఖ్యంగా ైక్లెమాక్స్ సూపర్. దైవశక్తితో కూడిన ఓ ద్రవాన్ని శరీరంలోకి తీసుకున్న యాస్కిన్ అతిబలవంతుడుగా అవతరించడం, పరమాత్మను గర్భంలో మోస్తున్న సుమతి.. యాస్కిన్ మనుషులకు దొరికిపోవడంతో ఫస్ట్పార్ట్ని ముగించాడు.
నటీనటుల నటన
ఇందులో నటించిన వారంతా ఉద్దండులే. అమితాబ్, కమల్హాసన్, ప్రభాస్, దీపిక, శోభన, రాజేంద్రప్రసాద్.. వీరి నటన గురించి ప్రత్యేకించి చెప్పుకునేదేముంది!.. అందరూ అద్బుతంగా నటించారు. కురుక్షేత్ర సంగ్రామంలో అర్జునుడిగా కనిపించి అందరినీ షాక్కి గురిచేశాడు రౌడీ హీరో విజయ్ దేవరకొండ. లెజెండ్రీ దర్శకులు రామ్గోపాల్వర్మ, రాజమౌళి కూడా చెరో సన్నివేశంలో తళుక్కున మెరిసి మాయమయ్యారు. దుల్కర్ సల్మాన్, మృణాళ్ఠాకూర్, ఫరియా అబ్దుల్లా ప్రత్యేక పాత్రల్లో కనిపించారు.
సాంకేతికంగా
ఇదో టెక్నికల్ మాయాజాలం. తెలుగు సినిమా స్థాయిని మరోస్థాయిలో నిలబెట్టేలా ఉంది ఇందులోని టెక్నికల్ వర్క్. పాటలు అంతంతమాత్రంగానే ఉన్నాయి. కెమెరా విజువల్స్ సూపర్. సంతోశ్ నారాయణన్ బ్యాగ్రౌండ్ స్కోర్ అద్భుతం. రాజీ అనే పదానికి తావివ్వకుండా అత్యున్నత సాంకేతిక విలువలతో సినిమాను నిర్మించారు సి.అశ్వనీదత్. ఈ సినిమా పుణ్యమా.. తెరపై ఓ కొత్తలోకాన్ని ప్రేక్షకులు చూడొచ్చు. వైవిధ్యమైన చిత్రాలను ఇష్టపడే ప్రేక్షకులకు ‘కల్కి 2898 ఏడీ’ తప్పకుండా నచ్చుతుంది.
బలాలు : కథ, నటీనటుల నటన, అబ్బురపరిచే సాంకేతికత
బలహీనతలు : కథనం, సన్నివేశాల సాగతీత..
రేటింగ్ : 3/5