వికారాబాద్, జూన్ 5 : పార్లమెంట్ ఎన్నికల అనంతరం జిల్లాలో నాలుగు నియోజకవర్గాలకు సంబంధించి వీవీ ప్యాట్లను స్థానిక తహసీల్దార్ కార్యాలయం స్ట్రాంగ్ రూమ్ నందు భద్రపరిచినట్లు వికారాబాద్ కలెక్టర్ నారాయణరెడ్డి తెలిపారు. బుధవారం ఎస్పీ కోటిరెడ్డితో కలిసి ఈవీఎంలను భద్రపరిచిన ఏఎంసీ గోడౌన్, తహసీల్దార్ కార్యాలయ స్ట్రాంగ్ రూమ్లను కలెక్టర్ పరిశీలించారు.
ఎన్నికల కమిషన్ ఆదేశాల మేరకు పార్లమెంట్ ఎన్నికల కౌంటింగ్ పూర్తయిన సందర్భంగా వికారాబాద్, కొడంగల్, పరిగి, తాండూరు నియోజకవర్గాలకు సంబంధించి ఎన్నికల నిర్వహణకు ఉపయోగించిన ఈవీఎంలు, కంట్రోల్ యూనిట్లు, బ్యాలట్ యూనిట్లను ఏఎంసీ గోడౌన్లో భద్రపరిచామని వివరించారు. సంబంధిత రిజిస్టర్ లలో సంతకాలు చేశారు. నిరంతర సీసీ కెమెరాల పర్యవేక్షణ ఉండాలని సంబంధిత అధికారులకు ఆదేశించారు. ఈ కార్యక్రమంలో జడ్పీ సీఈవో సుదీర్, ఆర్డీవో వాసుచంద్ర, తహసీల్దార్ లక్ష్మీనారాయణ, ఎన్నికల సిబ్బంది తదితరులు ఉన్నారు.