రంగారెడ్డి, జూలై 14 (నమస్తే తెలంగాణ) : భూ గర్భ జలాలు రోజురోజుకూ అడుగంటుతుండడం ఆందోళన కలిగిస్తున్నది. నీటి సంరక్షణకు చర్యలు చేపట్టకపోతే భవిష్యత్తు తరాలకు ముప్పు వాటిల్లుతుంది. ఈ ఉపద్రవానికి ముందే చెక్ పెట్టేందుకు రాష్ట్ర ప్రభుత్వం అప్రమత్తంగా వ్యవహరిస్తున్నది. నీటి వృథాను అరికట్టే దిశగా చర్యలు తీసుకుంటున్నది.
ముఖ్యంగా పరిశ్రమల్లో వివిధ అవసరాల నిమిత్తం బోర్ల నుంచి విచ్చలవిడిగా నీటిని తోడుతున్నారు. దానిని నియంత్రించేందుకు బోర్లకు మీటర్లు ఏర్పాటు చేయాలని ప్రభుత్వం నిర్ణయించింది. ఇందుకు సంబంధించిన ప్రక్రియ రంగారెడ్డి జిల్లాలో ఇప్పటికే మొదలు కాగా.. భూగర్భజల శాఖ అధికారులు ఆ దిశగా చర్యలు చేపట్టి బోర్లకు నీటి మీటర్లను ఏర్పాటు చేయిస్తున్నారు.
వృథాకు అడ్డుకట్ట..
జిల్లాలో సూక్ష్మ, చిన్న, మధ్యతరహా, భారీ, మెగా పరిశ్రమలు కలిపి మొత్తం 4,428 వరకు ఉన్నా యి. పరిశ్రమల నిర్వహణ కోసం బోర్లను ఇష్టానుసారంగా వేస్తున్నారు. పరిశ్రమలు స్థాపించే సమయంలో ఒకటి, రెండు బోర్లకు మాత్రమే అనుమతులు పొంది ఆ తర్వాత పెద్ద సంఖ్యలో బోర్లు వేసుకుని నీటిని వాడుతున్నారు. ఆయా బోర్ల నుంచి జలాలను ఇష్టం వచ్చినట్లు తోడేస్తుండడంతో.. ఈ ప్రభావం భూగర్భజలాలపై పడుతున్నది. వాస్తవానికి ఎన్ని బోర్లు అవసరం? నిత్యం ఎన్ని లీటర్ల నీటిని వాడుతున్నారు..? తదితర విషయాలను ఎప్పటికప్పుడు పరిశ్రమల నిర్వాహకులు తెలియజే యాల్సి ఉంటుంది. కానీ..ఇది ఎక్కడా అమలుకావడం లేదు. కొన్ని పరిశ్రమలు ఇష్టానుసారంగా బోర్లు వేసి నీటిని వాడుతున్నాయి.
పరిస్థితి ఇలానే కొనసాగితే భవిష్యత్తు తరాలకు నీటి ఎద్దడి ఏర్పడే ప్రమాదమని భావించిన ప్రభుత్వం నీటి లెక్కలు తేల్చేందుకు సిద్ధమైనది. వెయ్యి లీటర్లకు ప్రభుత్వం నిర్దేశించిన మేర రుసుమును పరిశ్రమల నిర్వాహకులు చెల్లించాల్సి ఉంటుంది. ప్రతి మూడేండ్లకొకసారి రెన్యువల్ చేయించుకోవాల్సి ఉంటుంది. ఈ విధానంతో వృథా నీటికి అడ్డుకట్ట పడడంతోపాటు ప్రభుత్వానికి కొంతమేర ఆదాయం సమకూరనున్నది.
విడతల వారీగా అమలు..
భూగర్భజల శాఖ అధికారులు క్షేత్రస్థాయిలో పర్యటించి పరిశ్రమల్లోని బోర్లను పరిశీలిస్తున్నారు. పరిశ్రమల నిర్వాహకులు వాడుకుంటున్న బోర్ల లెక్కలను తీస్తున్నారు. అనుమతులు ఉన్నవి ఎన్ని? లేని వి ఎన్ని? అన్న వివరాలను సేకరిస్తున్నారు. అనుమతులు లేకపోతే నోటీసులు జారీ చేసి బోర్లకు నీటి మీటర్లను ఏర్పాటు చేయిస్తున్నారు. జిల్లాలో 400లకు పైగా పరిశ్రమలు టీజీఐపాస్ ద్వారా అనుమతులను పొంది ఉండడంతో వాటికి మీటర్లను ఏర్పాటు చేసుకోవాలని అధికారులు సూచిస్తున్నా రు. మరో 200 పరిశ్రమలకు ఎటువంటి అనుమతులు లేకపోవడంతో వాటన్నింటికీ నోటీసులు అం దజేశారు. వాటిల్లో ఇప్పటికే 125 పరిశ్రమలకు మీటర్ల ఏర్పాటు సంబంధించి చర్యలు మొదలైన ట్లు అధికారులు చెబుతున్నారు.
పరిశ్రమలతోపాటు కొంతమంది రిసార్ట్స్ నిర్వాహకులు, షాపింగ్ కాం ప్లెక్స్లు, ఫంక్షన్హాళ్లు, హోటళ్లు, మినరల్ వాటర్ ప్లాంట్లు, రైస్మిల్లుల నిర్వాహకులు బోర్ల ద్వారా పెద్ద ఎత్తున నీటిని వాడుకుంటున్నారు. ఈ క్రమం లో వీటిపైనా అధికారులు దృష్టి కేంద్రీకరించారు. ఇప్పటికే జిల్లాలో 24 రిసార్ట్స్ను గుర్తించి నోటీసులు ఇచ్చారు. 19 మంది రిసార్ట్స్ నిర్వాహకులు బోర్లకు మీటర్లు ఏర్పాటు చేసుకునే పనిలో నిమగ్నమయ్యారు. విడతల వారీగా బోర్ల ద్వారా నీటిని వాడుకుంటున్న వారందరూ మీటర్లు ఏర్పాటు చేసుకోవడం తప్పనిసరి అని, ఆ దిశగా చర్యలు తీసుకుంటున్నట్లు భూగర్భజల శాఖ అధికారులు చెబుతున్నారు.