షాబాద్, మే 12: చేవెళ్ల పార్లమెంటు నియోజకవర్గానికి సంబంధించిన పోస్టల్ బ్యాలెట్లను కట్టుదిట్టమైన భద్రత నడుమ ఓట్ల లెక్కింపు కేంద్రమైన చేవెళ్ల మండలం గొల్లపల్లి గ్రామంలోని శ్రీ బండారి శ్రీనివాస్ ఇంజినీరింగ్ కళాశాలలోని స్ట్రాంగ్ రూంకు ఆదివారం తరలించారు. రిటర్నింగ్ అధికారి, రంగారెడ్డి కలెక్టర్ శశాంక స్వీయ పర్యవేక్షణలో ఈ ప్రక్రియ కొనసాగింది.
ఆయా అసెంబ్లీ నియోజకవర్గాల నుంచి వచ్చిన పోస్టల్ బ్యాలెట్లను ముందుగా సమీకృత జిల్లా కార్యాలయాల సముదాయంలోని స్ట్రాంగ్ రూంలో భద్రపర్చగా, వాటిని పకడ్బందీ ఏర్పాట్ల మధ్య ప్రత్యేక కంటైనర్ వాహనంలో ఆదివారం కౌంటింగ్ సెంటర్ స్ట్రాంగ్ రూంకు చేర్చారు. ఎన్నికల సాధారణ పరిశీలకుడు రాజేందర్కుమార్ కటారియాతో పాటు జిల్లా అదనపు కలెక్టర్ ప్రతిమాసింగ్, చేవెళ్ల ఆర్డీవో/ఏఆర్వో సాయిరాం, ఎన్నికల్లో పోటీ చేస్తున్న అభ్యర్థుల తరఫున వారి ఏజెంట్ల సమక్షంలో పోస్టల్ బ్యాలెట్లను జాగ్రత్తగా భద్రపర్చి, స్ట్రాంగ్ రూంకు సీల్ వేశారు.