వికారాబాద్, జూలై 23 (నమస్తే తెలంగాణ): అర్హులందరికీ రూ.2 లక్షల వరకు పంట రుణాలను మాఫీ చేస్తామంటూ గొప్పలు చెప్పుకొంటున్న కాంగ్రెస్ ప్రభుత్వం అన్నదాతను అడుగడుగునా ఇబ్బందులకు గురి చేస్తున్నది. గత బీఆర్ఎస్ ప్రభు త్వం ఎలాంటి షరతుల్లేకుండా రుణమాఫీ ప్రక్రియను పూర్తి చేస్తే.. ప్రస్తుత రేవంత్ సర్కార్ ప్రకటించిన రూ. లక్ష లోపు రుణమాఫీపై కొర్రీలతోపాటు గందరగోళ పరిస్థితులు నెలకొన్నాయి. మాఫీకి అర్హత ఉండి జాబితాలో పేరు రాని వారు కొందరైతే.. రుణమాఫీ జాబితాలో పేర్లుండి కూడా.. మాఫీ సొమ్ము ఖాతాల్లో పడని వారు వేల సంఖ్యలో ఉన్నారు. ప్రభుత్వం పెడుతున్న కొర్రీలతో అన్నదాతలు తీవ్ర ఇబ్బందులు పడుతున్నారు. పట్టాదారు పాసుపుస్తకం ప్రామాణికమంటూ రేషన్కార్డు ఆధారంగా ప్రక్రియను కొనసాగిస్తూ అర్హులకు అన్యాయం చేస్తుండడంతో సర్కారుపై రుసరుస లాడుతున్నారు.
తాజాగా క్షేత్రస్థాయిలో వ్యవసాయాధికారులు రైతులకు కొత్త కష్టాలను తీసుకొచ్చారు. రూ.2 లక్షలపైన ఉన్న రుణాలను ఆగస్టు 15 లోపు చెల్లిస్తేనే రుణమాఫీ వర్తిస్తుందని.. లేకపోతే వర్తించదని వ్యవసాయ అధికారులు రైతులకు సూచిస్తున్నారు. ఎలాంటి షరతుల్లేకుండా రూ.2 లక్షల్లోపు రుణాలను మాఫీ చేస్తామని హామీఇచ్చి.. ఇప్పుడు మెలిక పెట్టడంపై జిల్లా రైతాంగం ఆగ్రహం వ్యక్తం చేస్తున్నది. రేషన్ కార్డు ఆధారంగా ఓ కుటుంబంలో ఐదుగురి పేరి ట రుణాలుండి వడ్డీతో కలిపి రూ.2 లక్షలపైన ఉన్నైట్లెతే తప్పనిసరిగా పైచిలుకు మొత్తాన్ని చెల్లించాల్సి ఉంటుంది. ఇందుకు సంబంధించిన విధివిధానాలు ఆగస్టు మొదటి వారంలో విడుదల కానున్నట్లు సమాచారం.
ఏక కాలంలో రూ.2 లక్షల రుణాలను మాఫీ చేస్తామని రైతులకు కాంగ్రెస్ ప్రభుత్వం హామీనిచ్చి ప్రస్తుతం రూ.లక్ష లోపు రుణాల మాఫీ ప్రక్రియను చేపట్టింది. అయితే పట్టాదారు పాసుపుస్తకం కాకుండా రేషన్కార్డును ప్రామాణికంగా తీసుకోవడంతో వేలాది మంది అర్హులైన రైతులు నష్టపోతున్నారు. అదేవిధంగా రూ.2 లక్షలపైన ఉన్న రుణాలను ఆగస్టు 15లోపు చెల్లిస్తేనే రుణమాఫీ వర్తిస్తుందని వ్యవసాయాధికారులు చెప్తుండడంపై జిల్లా రైతాంగం ఆగ్రహం వ్యక్తం చేస్తున్నది. ఒక వైపు రుణాలను మాఫీ చేస్తున్నామంటూనే తిరిగి రైతుల నుంచి ముక్కు పిండి వసూలు చేయడంపై సర్వత్రా విమర్శలు వెల్లువెత్తుతున్నాయి. ఎన్నికలకు ముందు ప్రగల్భాలు పలికి ఇప్పుడు తమను నట్టేట ముంచుతున్నారని కాంగ్రెస్ ప్రభుత్వ తీరుపై అన్నదాతలు తీవ్ర అసంతృప్తి వ్యక్తం చేస్తున్నారు. మరోవైపు రుణాలు రూ.2లక్షల పైచిలుకు ఉన్న రైతులు మిగతా రుణాలను చెల్లించేందుకు వడ్డీ వ్యాపారులను ఆశ్రయిస్తున్నారు. ఇప్పటికే పంట పెట్టుబడికి అప్పులు చేసిన రైతులు, ఇప్పుడు రుణమాఫీ వర్తించేందుకు అప్పులు చేయాల్సిన పరిస్థితి వచ్చిందని ఆవేదన వ్యక్తం చేస్తున్నారు. కేసీఆర్ ప్రభుత్వం ఎలాంటి షరతుల్లేకుండా పట్టాదారు పాసుపుస్తకాన్ని ప్రామాణికంగా తీసుకొని రూ.లక్షలోపు రుణాలను మాఫీ చేసిన విషయాన్ని రైతులు ఊరూరా గుర్తు చేసుకుంటున్నారు.
జిల్లా వ్యవసాయాధికారి కార్యాలయం మొదలుకొని క్షేత్రస్థాయిలో ఏఈవోల వరకు రైతులు వేలాదిగా తరలివచ్చి రుణమాఫీ కాలేదంటూ ఫిర్యాదులు చేస్తూనే ఉన్నారు. కాంగ్రెస్ ప్రభుత్వం నిబంధనలు పెట్టి కేవలం కొంతమందికే రుణమాఫీ చేయడంతో మా పంట రుణాలు ఎందుకు మాఫీ కాలేదంటూ ఫిర్యాదులు వస్తున్నాయి. రుణమాఫీ కాని రైతుల సంఖ్య అధికంగా ఉండడంతో కలెక్టరేట్లో ప్రత్యేకంగా కంట్రోల్ రూంను ఏర్పాటు చేయడంతోపాటు ఏడీవోలోని టెక్నికల్ సెక్షన్లో, మండల వ్యవసాయాధికారి కార్యాలయంలో, క్షేత్రస్థాయిలో క్లస్టర్ల వారీగా ఏఈవోలు రుణమాఫీ కాని రైతుల నుంచి విజ్ఞప్తులను స్వీకరిస్తున్నారు. ఇప్పటివరకు జిల్లావ్యాప్తంగా సుమారు 2వేల మంది రైతులు తమకు రూ.లక్ష లోపు రుణాలున్నా రుణమాఫీ కాలేదని విన్నవించారు. వీరందరికీ రేషన్ కార్డు లేకపోవడంతోనే రుణమాఫీ వర్తించలేదని సంబంధిత శాఖ అధికారులు చెబుతున్నారు.
అసెంబ్లీ ఎన్నికల సమయంలో రేవంత్రెడ్డి అధికారంలోకి రాగానే ఒకేసారి రూ. రెండు లక్షల రుణాలను మాఫీ చేస్తామని చెప్పి.. ఇప్పుడు విడతల వారీగా చేయడం సరైంది కాదు. ఎన్నికల్లో ఇచ్చిన మాట ప్రకారం ఒకేసారి రూ.2 లక్షల రుణాలను మాఫీ చేయాలి. నా అప్పు రూ.2,50,000 వరకు ఉన్నది. రూ.రెండు లక్షల పైన ఉన్న డబ్బును వచ్చే నెల 15 లోపు చెల్లిస్తేనే రుణ మాఫీ వర్తిస్తుందని వ్యవసాయాధికారులు చెబుతున్నారు. అలా కట్టించుకోవడం సమంజసం కాదు.
– ముడావత్ లక్ష్మణ్, రైతు, ఎర్రగడ్డతండా, పెద్దేముల్
ఎన్నికల్లో ఇచ్చిన మాట ప్రకారం ఏకకాలంలో రుణమాఫీ చేస్తే నాతోపాటు ఎంతో మంది రైతుల రుణాలు మాఫీ అయ్యేవి. నా అప్పు రూ.2,72,000 వరకు ఉన్నది. ప్రస్తుతం రూ.లక్ష వరకు రుణాలను మాఫీ చేస్తుండడంతో నా అప్పు మాఫీ కాలేదు. కాగా వ్యవసాయ అధికారులు రుణమాఫీ వర్తించాలంటే ఆగస్టు 15 లోపు రూ. రెండు లక్షలపైన ఉన్న మొత్తాన్ని చెల్లిస్తేనే మాఫీ అవుతుందని..లేకుంటే మాఫీ వర్తించదని చెబుతున్నారు. ఇప్పటికే పంటల సాగుకు వడ్డీ వ్యాపారులను ఆశ్రయించి అప్పుల ఊబిలో కూరుకుపోయా. అన్నదాతల ఇబ్బందులను గుర్తించి ప్రభుత్వం ఆ నిబంధనను తొలగించి అన్ని రుణాలను మాఫీ చేయాలి.
– ముడావత్ రమేశ్, రైతు, నెల్లిగడ్డతండా, పెద్దేముల్