మణికొండ, జూలై 22: గండిపేట కాలువ(క్యాండూట్) పై అక్రమ నిర్మాణాలపై జలమండలి విజిలెన్స్ అధికారులు విచారణ కోసం కదిలారు. ఈ నెల 21న ‘నమస్తే’లో ప్రచురితమైన ‘వాటా ఇచ్చుకో.. వ్యాపారం చేసుకో’ కథనంపై జలమండలి ఉన్నతాధికారులు స్పందించారు. కమిషనర్ ఆదేశాల మేరకు స్థానిక సెక్షన్ -17 డీజీఎం నరహరితో జలమండలి విజలెన్స్ అధికారి లక్ష్మీరెడ్డి, సురేశ్ మణికొండ, నార్సింగి మున్సిపాలిటీ పరిధిలోని గండిపేట కాలువను సందర్శించారు. క్యాండూట్పై వెలసిన అక్రమ నిర్మాణాలు, వ్యాపార కేంద్రాలను తక్షణమే తొలగించేందుకు యుద్ధప్రతిపాదికన చర్యలు చేపట్టారు.
కాలువ శిథిలావస్థకు చేరుకోవడానికి జలమండలి సిబ్బంది వైఖరే కారణమంటూ.. స్థానికులు అధికారుల దృష్టికి తీసుకొచ్చారు. పుప్పాలగూడ బీఆర్సీ ఎదురుగా ఓ నిర్మాణ సంస్థ నిబంధనలను తుంగలో తొక్కుతూ క్యాండూట్పై నిర్మించిన పైకప్పు, టైల్స్తో పాటు రేకులను జేసీబీల సహాయంతో తొలగించారు. తాత్కాలికంగా ఏర్పాటు చేసిన అక్రమ నిర్మాణాలు కొన్నింటిని తొలగించామని, మిగిలిన వాటిని స్థానిక పోలీసులు, మున్సిపల్ అధికారుల సహాయంతో తొలగిస్తామని జలమండలి విజిలెన్స్ అధికారులు లక్ష్మీరెడ్డి, సురేశ్ తెలిపారు. క్యాండూట్పై ఎవరైనా అక్రమ నిర్మాణాలు చేపడితే..వారిపై క్రిమినల్ కేసులు నమోదు చేస్తామని అధికారులు హెచ్చరించారు.