కొడంగల్, జూన్ 26 : అభివృద్ధి పనులను కొనసాగించేందుకు ప్రతి ఒక్కరూ సహకరించి ముందుకు రావాలని కడ ప్రత్యేకాధికారి వెంకట్రెడ్డి, ఆర్డీవో శ్రీనివాసరావు తెలిపారు. బుధవారం స్థానిక తహసీల్దార్ కార్యాలయంలో మండలంలోని అప్పాయిపల్లి గ్రామ సర్వే నం.19కి సంబంధించిన రైతులతో అభిప్రాయ సేకరణ కార్యక్రమాన్ని చేపట్టారు. ఈ సందర్భంగా అధికారులు మాట్లాడుతూ కొడంగల్కు మంజూరైన మెడికల్ కళాశాల ఏర్పాటుకు గాను భూ సేకరణ నిమిత్తం రైతులతో అభిప్రాయ సేకరణ కార్యక్రమాన్ని నిర్వహించినట్లు తెలిపారు.
సర్వే నం.19లోని రైతులకు ప్రభుత్వం ఎటువంటి అన్యాయం తలపెట్టదని, ఎకరాకు రూ.10లక్షలతో పాటు కుటుంబంలో ఒకరికి ఉద్యోగం కేటాయించే దిశగా ప్రభుత్వం యోచిస్తున్నట్లు వారు పేర్కొన్నారు. ఇదివరకే 23 మందికి సంబంధించి 33 ఎకరాలు ప్రభుత్వానికి ఇచ్చేందుకు రైతులు ఒప్పుకున్నారన్నారు. మిగతా రైతులు కూడా ఈ అవకాశాన్ని సద్వినియోగం చేసుకోవడంతో పాటు స్థానికంగా మెడికల్ కళాశాల ఏర్పాటుతో మీ ప్రాంతం త్వరితగతిన అభివృద్ధి చెందుతుందని తెలిపారు.
ఇందుకు రైతులు మాట్లాడుతూ ఎకరాకు రూ.10లక్షలు ఇవ్వడం వల్ల రైతులు మరో చోట భూమిని కొనలేని పరిస్థితి ఉన్నదని, భూమిని తీసుకొని మరో చోట భూమిని కేటాయిస్తే రైతులమంతా సంతోషిస్తామని పేర్కొన్నారు. లేదంటే ఇచ్చే పారితోషికాన్ని ప్రభుత్వం పెంచితే కొంత వరకు ఆలోచిస్తామని, ప్రభుత్వం రైతులను కాపాడే దిశగా కృషి చేస్తే మేలు చేకూరుతుందని రైతులు కోరారు. రైతుల అభిప్రాయాలను ఉన్నతాధికారుల దృష్టికి తీసుకెళుతామని తెలిపారు. కార్యక్రమంలో తహసీల్దార్ విజయ్కుమార్, రెవెన్యూ సిబ్బంది, సర్వే నం.19కి సంబంధించిన రైతులు పాల్గొన్నారు.