రంగారెడ్డి, జూన్ 21 (నమస్తే తెలంగాణ) : ఖరీఫ్ సీజన్ ప్రారంభమైంది. విత్తనాలు, ఎరువులు కొందామంటే రైతుల చేతుల్లో చిల్లిగవ్వ లేదు. రైతు భరోసా జాడే లేదు. జిల్లా వార్షిక రుణ ప్రణాళిక ఇంకా ఖరారు కాలేదు. దీంతో బ్యాంకుల నుంచి రుణాలు రాక రైతులకు సాగు భారంగా మారింది. రుణమాఫీ అవుతుందన్న ఆశతో పంట రుణాలను దీర్ఘకాలికంగా చెల్లించకపోవడంతో రంగారెడ్డి జిల్లాలో చాలామంది రైతులు ఎన్పీఏ(నాన్ పర్ఫార్మింగ్ అసెట్స్) జాబితాలో చేరిపోయారు. విధిలేక రైతులు ప్రైవేట్ వ్యాపారులపై ఆధారపడాల్సిన దుస్థితి వచ్చింది.
రుణాల కోసం ఎదురుచూపులు..
రంగారెడ్డి జిల్లాలో వానకాలం సాగును రైతులు 4.45 లక్షల ఎకరాల్లో చేపట్టే అవకాశం ఉందని జిల్లా వ్యవసాయ శాఖ అంచనా వేస్తున్నది. పత్తి 1.76 లక్షల ఎకరాల్లో, వరి 1.38 లక్షల ఎకరాలు, మొక్కజొన్న 66వేల ఎకరాలు, మిగతా ఎకరా ల్లో జొన్న, పెసర్లు, కందులు, మినుములు, వేరుశనగ, ఆముదం తదితర పంటలను రైతాంగం సాగు చేయనున్నది. ఇప్పటికే రైతులు 53,971 ఎకరాల్లో వివిధ రకాల పంటలను సాగు చేస్తున్నారు. ఇందులో అత్యధికంగా 38 వేల ఎకరాల్లో పత్తిని వేశారు. అయితే విత్తనాలు, ఎరువుల కొనుగోలుకు రైతుల చేతుల్లో పైసలు లేవు. కాంగ్రెస్ ప్రభుత్వం రైతు భరోసాపై ఇప్పటివరకు ఎటువంటి అధికారిక ప్రకటన చేయలేదు. కేసీఆర్ హయాంలో రైతులకు ఠంచన్గా రైతుబంధు కింద ఎకరాకు రూ.5 వేల చొప్పున రైతులకు సీజన్ ఆరంభం నాటికే అందేవి. ఫలితంగా రైతులకు పెట్టుబడులకు ఎటువంటి ఇబ్బందులు లేకుండే. బ్యాంకుల నుంచి సైతం ఇబ్బడిముబ్బడిగా రుణాలు అందేవి. గతేడాది పంట రుణాల లక్ష్యం 2,7 92.53 కోట్లు కాగా.. బ్యాంకులు లక్ష్యానికి మించి 3,550.61కోట్లను రైతాంగానికి అందించాయి. ప్రస్తుతం రైతుభరోసా రాక.. రుణ ప్రణాళిక ఖరారు కాక రైతులు వడ్డీ వ్యాపారులను ఆశ్రయించాల్సిన పరిస్థితులు వచ్చాయని రైతాంగం ఆందోళన చెందుతున్నది.
మే నెలలోనే చేయాల్సి ఉండగా..
ఏటా మే నెలలో వార్షిక రుణ ప్రణాళిక ఖరారవుతుంది. వ్యవసాయ రంగంతోపాటు ఉపాధి, విద్య, గృహ నిర్మాణాలకు సంబంధించి బ్యాంకులు రుణాలను ప్రణాళికలో నిర్దేశిస్తాయి. బ్యాంకుల వారీగా వ్యవసాయ రంగానికి ఏ మేరకు రుణాలు ఇవ్వాలనేది ఈ ప్రణాళిక ద్వారా తెలుస్తుంది. ఏడాది వార్షిక రుణ ప్రణాళిక ఇంకా ఖరారు కాలేదు. ఈ ఏడాది ఎన్నికల నేపథ్యంలో కోడ్ అమల్లో ఉండడంతో వార్షిక రుణ ప్రణాళికను వెల్లడించేలేదని తెలుస్తున్నది. ఈ నెలాఖరులోపు ప్రణాళికను విడుదల చేసే అవకాశం ఉన్నట్లు సమాచారం. రుణాలను పునరుద్ధరించి ప్రస్తుత సీజన్కు కొత్త రుణాలు ఇచ్చేందుకు సిద్ధంగా ఉన్నా రైతులు ముందుకు రావడం లేదని బ్యాంకర్లు చెబుతున్నారు. రుణమాఫీ అవుతుందనే కారణంతో రైతులు బ్యాంకులకు వెళ్లడంలేదు. పాత బాకీ చెల్లించి, తిరిగి రుణం పొందితే రుణమాఫీ అవుతుందో ? లేదో.. అన్న అయోమయంలో వారు ఉన్నారు.
రుణమాఫీపైనే ఆశలు..
కాంగ్రెస్ ప్రభుత్వం లోక్సభ ఎన్నికల సమయంలో ఆగస్టులోగా రుణమాఫీ ఉం టుందని ప్రకటించింది. దీనికి సంబంధించి ఇంకా మార్గదర్శకాలు విడుదల చేయకపోవడంతో ఎంతమందికి రుణమాఫీ అవుతుందన్న విషయమై సందిగ్ధత నెల కొన్నది. బ్యాంకుల్లో ఉన్న రుణాలను చెల్లించి, తిరిగి పంట రుణం పొందితే రుణమాఫీ వర్తిస్తుందా? లేదా..? అన్నదానిపై బ్యాంకర్లు కూడా స్పష్టత ఇవ్వడం లేదు. రుణమాఫీకి సంబంధించిన మార్గదర్శకాలు వస్తేనే రుణమాఫీపై మరింత స్పష్టత వస్తుందని అధికారులు పేర్కొంటున్నాయి. రైతులు కొత్తగా రుణాలు పొందేందుకు రుణమాఫీతో ముడిపడి ఉండడంతో అధిక వడ్డీలకు ప్రైవేట్ వ్యాపారుల వద్ద రుణాలు తీసుకుని ఆర్థికంగా చితికిపోవాల్సి వస్తున్నది. ఈ విషయంపై ప్రభుత్వం దృష్టిసారించాల్సిన అవసరం ఉందని రైతులు కోరుతున్నారు.