మంత్రివర్గ విస్తరణలో భాగంగా ఎమ్మెల్సీ పట్నం మహేందర్ రెడ్డికి సీఎం కేసీఆర్ తన కేబినెట్లో చోటు కల్పించారు. ఈ మేరకు గురువారం రాజ్భవన్లో ప్రమాణ స్వీకారోత్సవం అట్టహాసంగా జరిగింది. గవర్నర్ తమిళి సై, సీఎం కేసీఆర్, మంత్రులు, ఎమ్మెల్యేల సమక్షంలో మహేందర్రెడ్డి భూగర్భ గనులు, సమాచార శాఖల మంత్రిగా ప్రమాణ స్వీకారం చేశారు. రెండోసారి తనను మంత్రి వర్గంలోకి తీసుకోవడంపై హర్షం వ్యక్తం చేస్తూ సీఎం కేసీఆర్ను కలిసి పుష్పగుచ్ఛం అందజేసి కృతజ్ఞతలు తెలిపారు. ఈ సందర్భంగా మంత్రి మహేందర్రెడ్డికి శుభాకాంక్షలు వెల్లువెత్తాయి. ఉమ్మడి జిల్లా ప్రజాప్రతినిధులతోపాటు పలువురు మంత్రిని కలిసి అభినందనలు తెలిపారు. ఈ సందర్భంగా మహేందర్రెడ్డి మాట్లాడుతూ సీఎం కేసీఆర్ అన్ని వర్గాలకు ప్రాధాన్యం కల్పిస్తున్నారన్నారు. ఉమ్మడి జిల్లాలోని అన్ని నియోజకవర్గాల బీఆర్ఎస్ అభ్యర్థుల గెలుపునకు కృషి చేస్తానన్నారు.
-వికారాబాద్, ఆగస్టు 24 (నమస్తే తెలంగాణ)
వికారాబాద్, ఆగస్టు 24, (నమస్తే తెలంగాణ) : రాష్ట్ర ముఖ్యమంత్రి కేసీఆర్ మంత్రివర్గంలో మంత్రి మహేందర్ రెడ్డికి చోటు దక్కింది. ఈ మేరకు గురువారం రాజ్భవన్లో సీఎం కేసీఆర్ తదితరుల సమక్షంలో పట్నం మహేందర్ రెడ్డి మంత్రిగా ప్రమాణ స్వీకారం చేశారు. మధ్యాహ్నం 3.30 గంటలకు గవర్నర్ మహేందర్ రెడ్డిని ప్రమాణ స్వీకారం చేయించారు. మంత్రి మహేందర్ రెడ్డి ప్రమాణ స్వీకారోత్స కార్యక్రమం అట్టహాసంగా జరిగింది. ప్రమాణ స్వీకారోత్సవం అనంతరం సీఎం కేసీఆర్తోపాటు మంత్రులు, ఎమ్మెల్యేలు శుభాకాంక్షలు తెలిపారు. అయితే మంత్రివర్గం నుంచి ఈటల రాజేందర్ను బర్తరఫ్ చేసిన అనంతరం ఇప్పటివరకు భర్తీ చేయని ఆ స్థానంలో ఉమ్మడి రంగారెడ్డి జిల్లా స్థానిక సంస్థల ఎమ్మెల్సీగా ఉన్న పట్నం మహేందర్ రెడ్డిని సీఎం కేసీఆర్ కేబినెట్లోకి తీసుకున్నారు. ప్రమాణ స్వీకారం అనంతరం కుటుంబ సభ్యులతో ప్రగతిభవన్ వెళ్లిన మంత్రి మహేందర్రెడ్డి ముఖ్యమంత్రి కేసీఆర్కు పుష్పగుచ్ఛం అందజేసి ధన్యవాదాలు తెలిపారు.
మంత్రి మహేందర్ రెడ్డి బయోడేటా..
పేరు : పట్నం మహేందర్ రెడ్డి
తల్లిదండ్రులు: పట్నం మల్లారెడ్డి, రుక్కమ్మ
భార్య : పట్నం సునీతారెడ్డి (జడ్పీ చైర్పర్సన్)
కుమారుడు : పట్నం రినీష్ రెడ్డి
కూతురు : మనీషా రెడ్డి
విద్యార్హత : వెటర్నరీ డిగ్రీ, అగ్రికల్చర్ యూనివర్సిటీ, రాజేంద్రనగర్
రాజకీయ ప్రవేశం : అన్న రాజేందర్ రెడ్డి అకాల మృతితో 1988లో..
ప్రభావం : ఎన్టీఆర్, పట్లోళ్ల ఇంద్రారెడ్డి పదవులు
మంత్రిగా : తెలంగాణ రాష్ట్ర తొలి రవాణా శాఖ మంత్రిగా 2014-18 వరకు
ఎమ్మెల్యేగా : 1994-1999
1999-2004
2009-2014
2014-2018
ఎమ్మెల్సీ : ఉమ్మడి రంగారెడ్డి స్థానిక సంస్థల ఎమ్మెల్సీగా రెండు పర్యాయాలు ఎన్నిక
భూగర్భగనులు, సమాచార శాఖ మంత్రిగా…
పట్నం మహేందర్ రెడ్డికి భూగర్భగనులు, సమాచార శాఖలను కేటాయించారు. అయితే సీఎం వద్ద ఉన్న భూగర్భగనులు, సమాచార శాఖలను మహేందర్ రెడ్డికి అప్పగిస్తూ గురువారం సాయంత్రం ఆదేశాలు జారీ చేశారు. అయితే నేడు లేదా రేపు రాష్ట్ర భూగర్భ గనులు, సమాచార శాఖల మంత్రిగా బాధ్యతలు చేపట్టనున్నారు. అయితే సీఎం కేసీఆర్ ప్రభుత్వంలో మహేందర్రెడ్డి రెండోసారి మంత్రి పదవిని దక్కించుకున్నారు. తెలంగాణ రాష్ట్రం ఏర్పాటైన అనంతరం ఏర్పాటైన ముఖ్యమంత్రి కేసీఆర్ తొలి ప్రభుత్వంలో రాష్ట్ర రవాణా శాఖ మంత్రిగా పనిచేశారు. అనంతరం 2018 ఎన్నికల్లో స్వల్ప ఓట్ల తేడాతో ఓడిపోగా, ఎమ్మెల్సీగా మహేందర్రెడ్డికి అవకాశమిచ్చారు. తదనంతరం 2022లో జరిగిన ఉమ్మడి రంగారెడ్డి స్థానిక సంస్థల ఎమ్మెల్సీ ఎన్నికల్లో ఎమ్మెల్సీగా ఏకగ్రీవంగా ఎన్నికయ్యారు.
సీఎం కేసీఆర్కు ప్రత్యేక ధన్యవాదాలు
రాష్ట్ర మంత్రివర్గంలోకి తీసుకున్నందుకు సీఎం కేసీఆర్, మంత్రులు కేటీఆర్, హరీశ్రావు, ఎంపీ రంజిత్ రెడ్డికి ధన్యవాదాలు. నాపై నమ్మకంతో కేబినెట్లో రెండోసారి మంత్రిగా తీసుకున్నారో అదే నమ్మకంతో పనిచేస్తూ రానున్న సార్వత్రిక ఎన్నికల్లో తాండూరు నియోజకవర్గంతోపాటు అన్ని నియోజకవర్గాల్లో బీఆర్ఎస్ పార్టీ అభ్యర్థులను గెలిపించేందుకు కృషి చేస్తా. ఉద్యమకారులతోపాటు అందరినీ కలుపుకొని పోయి పార్టీ అభ్యర్థుల గెలుపునకు పనిచేస్తాను.
– పట్నం మహేందర్ రెడ్డి, రాష్ట్ర భూగర్భగనులు, సమాచార శాఖల మంత్రి