సిటీబ్యూరో, జూలై 22 (నమస్తే తెలంగాణ) : మూడు నెలల్లో లక్ష కోట్లకు పెరిగిన మూసీ సుందరీకరణ అంచనా వ్యయంపై ఇంకా భిన్నాభిప్రాయాలు వ్యక్తమవుతూనే ఉన్నాయి. గోపన్పల్లి వేదికగా సీఎం రేవంత్ రెడ్డి చేసిన వ్యాఖ్యలను నగరవాసులు, సామాజికవేత్తలు తీవ్రంగా వ్యతిరేకిస్తున్నారు. లండన్లోని థేమ్స్ నది తరహాలో హైదరాబాద్కు జీవనది అయిన మూసీ ప్రక్షాళన చేయడం మంచిదే. కానీ ప్రజలకు మెరుగైన సౌలతులు, సౌకర్యాలను కల్పించాల్సిన ప్రాజెక్టులపై ఎందుకు సీఎం దృష్టి పెట్టడం లేదనే ప్రశ్నలు వస్తున్నాయి.
మూసీ రివర్ ఫ్రంట్ డెవలప్మెంట్ ప్రాజెక్టు కింద కంపు కొట్టే మూసీని గోదావరి నీళ్లతో నింపాలనే ప్రతిపాదలకు అప్పటి సీఎం కేసీఆర్ ప్రణాళికలను రూపొందించారు. ఇప్పటికే గోదావరి జలాలతో హైదరాబాద్ గొంతు తడిపేలా చేపట్టిన గోదావరి లింకేజీ గత వేసవిలో ఎంతగానో సాయపడింది. అవుటర్ రింగు రోడ్డు వెంబడి జలహారాన్ని ఏర్పాటు చేసేలా రింగ్ మెయిన్ ప్రాజెక్టును గత సీఎం కేసీఆర్ ఆచరణలోకి తీసుకొచ్చారు.
ఆ నీళ్లతోనే జంట జలాశయాల దిగువన ఉండే మూసీ ద్వారా నల్గొండ వరకు మూసీ జలాలను తరలించాలనే కార్యాచరణను ఐదేండ్ల కిందట గత సీఎం కేసీఆర్ చేపట్టారు. వీటితోపాటు నగరంలో మౌలిక వసతులకు అత్యంత ప్రాధాన్యతనిచ్చిన కేసీఆర్ సర్కార్.. హైదరాబాద్ నగరాన్ని గ్లోబల్ సిటీగా తీర్చిదిద్దేందుకు అవసరమైన అన్ని ప్రణాళికలను శాస్త్రీయంగా రూపొందించింది. గత ఆరునెలలుగా నగర వాసుల జీవన ప్రమాణాలను మెరుగుపరిచే ఎన్నో ఫ్లైఓవర్లు, అండర్పాసులతోపాటు, ఎక్స్ప్రెస్ హైవేలు, లింకు రోడ్లు గతంలో రూపొందించిన ప్రణాళికలకే మోక్షం లేకుండా పోయింది.
నగరం నలువైపులా మెట్రో విస్తరించాలనే అప్పటి ప్రభుత్వ ప్రణాళికల అలైన్మెంట్ మార్పులు, చేర్పులు తప్పా… ఇప్పటికీ కార్యరూపంలోకి కాంగ్రెస్ సర్కారు తీసుకురాలేకపోయింది. ఐదు నెలల కిందట గేట్ వే ఆఫ్ తెలంగాణగా పిలిచే నార్త్ హైదరాబాద్లోని రెండు ఎలివేటెడ్ ఫ్లై ఓవర్ల శంకుస్థాపన రోజునే మేడ్చల్ వరకు మెట్రో విస్తరించాలంటూ నిరసన వ్యక్తం చేశారు. ఇప్పటికీ ఆ ప్రతిపాదనపై ప్రభుత్వం స్పందించలేకపోయింది.