రంగారెడ్డి, జూన్ 25 (నమస్తే తెలంగాణ) : పంట పెట్టుబడి సాయం రూపు మారుతున్నది. సాగు చేస్తున్న భూములకే ‘రైతు భరోసా’ కింద ఆర్థిక సాయం అందించాలని కాంగ్రెస్ ప్రభుత్వం సూత్రప్రాయంగా అంగీకరించింది. పలు కొర్రీలతో సాయాన్ని తగ్గించి ఆర్థిక భారాన్ని తగ్గించుకునే ప్రయత్నం చేస్తున్నది. రైతుల నుంచి వ్యతిరేకత వస్తే ఎలా? అని ముందే గ్రహించిన ప్రభుత్వం రైతుల మనసులో ఉన్నదేమిటో తెలుసుకునేందుకు అభిప్రాయ సేకరణను చేపట్టాలని నిర్ణయించింది. ఈ మేరకు రంగారెడ్డి జిల్లాలో మంగళవారం ఐదు రైతు వేదికల్లో వ్యవసాయ శాఖ అభిప్రాయ సేకరణను చేపట్టింది. నియోజకవర్గానికి ఒకటి చొప్పున.. ఇబ్రహీంపట్నం నియోజకవర్గంలో మంచాల రైతు వేదిక, మహేశ్వరం నియోజకవర్గంలో కందుకూరు, షాద్నగర్ నియోజకవర్గంలో నందిగామ, రాజేంద్రనగర్ నియోజకవర్గంలో మల్కారం, చేవెళ్ల నియోజకవర్గంలో మొయినాబాద్లోని రైతు వేదికలో అభిప్రాయ సేకరణను నిర్వహించారు. ఈ కార్యక్రమానికి రైతులు అంతంత మాత్రంగానే హాజరయ్యారు. ఐదు రైతు వేదికలకు కేవలం 356 మంది మాత్రమే హాజరుకాగా.. అభిప్రాయ సేకరణ సైతం తూతూమంత్రంగానే సాగింది. రైతు వేదికకు ఒక్క రైతుతోనే వీడియో కాన్ఫరెన్స్ ద్వారా రాష్ట్ర స్థాయి అధికారులతో మాట్లాడించారు. మిగతా రైతుల నుంచి రాతపూర్వకంగా అభిప్రాయాలను సేకరించారు. ఇలా సేకరించిన వంద మంది రైతుల అభిప్రాయాలను ప్రభుత్వానికి పంపనున్నట్లు అధికారులు తెలిపారు.
‘పరిమితి’ సరైంది కాదు..
బీఆర్ఎస్ ప్రభుత్వం రైతుబంధు పథకాన్ని మొదలుపెట్టిన నాటి నుంచి గత ఏడాది వానకాలం సీజన్ వరకు మొత్తంగా జిల్లా రైతులకు పెట్టుబడి సాయంగా రూ.3,337 కోట్లు అందజేసింది. గత ఏడాది యాసంగి సీజన్ కొనసాగుతున్న సమయంలోనే అధికారంలోకి వచ్చిన కాంగ్రెస్ సర్కారు యాసంగి సీజన్కు గతంలో మాదిరే రైతులకు ఆర్థిక సాయం ఇస్తామని ప్రకటించి నెలల తరబడిగా సాయాన్ని కొనసాగించింది. సాయం భారాన్ని తగ్గించుకునేందుకు కాంగ్రెస్ ప్రభుత్వం పరిమితులు విధించేందుకు సిద్ధమవుతున్నది. ఐదెకరాల్లోపు భూములున్న రైతులకే ఆర్థిక సాయం అందించనున్నట్లు తెలుస్తున్నది. ఆదాయపన్ను చెల్లించే ఉద్యోగులు, ఇతర వర్గాల వారికి రైతు భరోసాను నిలిపివేయనున్నారు. ఈ క్రమంలో అభిప్రాయ సేకరణ సందర్భంగా పలువురు రైతులు ప్రభుత్వ నిర్ణయంపై ఆక్షేపణ తెలిపారు. పంటలను సాగు చేసిన అన్ని ఎకరాలకు రైతు బంధు ఇవ్వాల్సిందేనని స్పష్టం చేశారు.
కనీసం పది ఎకరాల వరకైనా ఇస్తే బాగుంటుందన్న అభిప్రాయాన్ని వ్యక్తం చేశారు. రుణాలు, ఇతరత్రా అవసరాల నిమిత్తం రైతులు ఆదాయ పన్ను చెల్లిస్తున్నారని, వారికి సాయం ఇవ్వకపోతే ఎట్లా? అని ప్రశ్నించారు. రేషన్ కార్డును సైతం ప్రామాణికంగా తీసుకోవద్దని సూచించారు. కౌలు రైతులకు సాయంపై రైతుల నుంచి మిశ్రమ స్పందన వ్యక్తమైంది. కౌలు రైతులకు సాయం ఇవ్వడం వల్ల భూ యజమానులు కౌలు రైతులకు భూములు ఇచ్చే ప్రసక్తి ఉండదని, ప్రభుత్వ నిర్ణయం.. కౌలు రైతుల పొట్టగొట్టడమే అవుతుందని కుండబద్దలు కొట్టినట్లు చెప్పారు. సాయాన్ని ఇరువురికి సమానంగా ఇస్తే బాగుంటుందన్న అభిప్రాయం.. కొన్ని రైతు వేదికల్లో రైతుల నుంచి వ్యక్తమైంది.
వానకాలం సీజన్కు సాయం అందేనా..
యాసంగి సీజన్ రైతుబంధు పంపిణీలో తీవ్ర జాప్యం చేసిన కాంగ్రెస్ ప్రభుత్వం ప్రస్తుత వానకాలం సీజన్లోనైనా సక్రమంగా ఇస్తుందా! లేదా? అన్న అనుమానాలను అభిప్రాయ సేకరణ సందర్భంగా పలువురు రైతులు వ్యక్తం చేశారు. వానకాలం సీజన్కు ఎకరాకు రూ.10వేలు ఇస్తుందా? లేక రూ.15వేలు ఇస్తుందా? అన్న సందేహాలను సైతం పలువురు రైతులు వ్యక్తం చేశారు. రైతు భరోసాపై అభిప్రాయ సేకరణ చేపట్టడం.. అసెంబ్లీలో చర్చించాక ప్రభుత్వ నిర్ణయాన్ని ప్రకటిస్తామని చెబుతుండడంతో వానకాలం సీజన్కు పెట్టుబడి సాయం అందించడంలో జాప్యం జరిగే అవకాశం ఉన్నదని రైతులు అనుమానం వ్యక్తం చేశారు. యాసంగి సీజన్లో మాదిరిగానే పంట వేసే సమయంలో కాకుండా పంట కోతలు పూర్తయ్యాక జమ చేసినా ఆశ్చర్యపోనక్కర్లేదన్న గుసగుసలు రైతుల నుంచి వినిపించాయి. ఎన్ని ఎకరాల్లో పంటలను సాగు చేశారో! నిర్ధారించాకే సాయం అందించే అవకాశం ఉందన్న టాక్ వినిపిస్తుండగా.. ప్రభుత్వం ఇదే విధానాన్ని అవలంబిస్తే.. సీజన్ మధ్యలో లేదా చివరలో సాయం సొమ్మును అందజేసే అవకాశాలున్నాయని రైతులు సందేహిస్తున్నారు. ఏదిఏమైనా.. సీజన్ ఆరంభంలోనే పెట్టుబడి సాయం అందిస్తే ప్రయోజనం ఉంటుందని రైతులు అభిప్రాయాలను వెల్లడించినట్లు అధికారులు స్పష్టం చేశారు.
సాయం అందించడంలో నిర్లక్ష్యం చేయొద్దు..
గత ప్రభుత్వం పెట్టుబడి సాయాన్ని అదునుకిచ్చేది. రైతు భరోసా ఇవ్వడంలో ఎట్టి పరిస్థితిల్లోనూ నిర్లక్ష్యం చేయొద్దు. కాంగ్రెస్ పార్టీ ఎన్నికల్లో ఇచ్చిన హామీ మేరకు రైతు భరోసాను పెంచాలి. సమయానికి ఇవ్వకపోతే విత్తనాలు, ఎరువులు కొనేందుకు అప్పులు చేయాల్సి వస్తుంది. రైతులు ఇబ్బందులు పడుతారు.
– కొంగర యాదగిరి, నర్సప్పగూడ, నందిగామ మండలం
సాగు భూములకే రైతు భరోసా ఇవ్వండి..
సాగు చేస్తున్న భూములకే రైతు భరోసా ఇవ్వండి. 20, 30, ఆపైన ఉన్న రైతులకు పెట్టుబడి సాయం అవసరం లేదు. ప్లాట్లు చేసే భూములు, ఫామ్ హౌస్లకు రైతు భరోసా ఇవ్వద్దు. ఏక కాలంలోనే రుణమాఫీ చేయాలి. ఐటీకి సంబంధం లేకుండా పెట్టుబడి సాయమందిస్తే మంచింది. లేదంటే తీవ్ర వ్యతిరేకత ఎదుర్కోవాల్సి వస్తుంది.
– దారెడ్డి సుధాకర్రెడ్డి, కేతిరెడ్డిపల్లి, మొయినాబాద్
ముందుగా ఇస్తే ఎరువులు, విత్తనాలు కొంటాం..
రైతు భరోసా సాయాన్ని ముందుగా ఇస్తే ఎరువులు, విత్తనాలను కొంటాం. ఆలస్యంగా ఇవ్వడం వల్ల అప్పులు చేసి కొనుగోలు చేయాల్సి వస్తున్నది. సరిపడా విత్తనాలు, ఎరువులను అందుబాటులో ఉంచాలి. అదునుకు సాగు చేయకపోతే తీవ్రంగా నష్టపోయే అవకాశముంటుంది.
– అంకం రాజు, నందిగామ
ఐటీ కట్టేవారికీ రైతు భరోసా ఇవ్వాలి..
గత ప్రభుత్వం ప్రతి రైతుకూ సాయమందించింది. కాంగ్రెస్ ప్రభుత్వం వచ్చాక అన్ని కొర్రీలు పెడుతున్నది. పిల్లల చదువుకు, ఏ ప్రాపర్టీ కొనుగోలు చేసినా ఐటీ కట్టే పరిస్థితి ఉన్నది. కాబట్టి ఐటీ కట్టేవారికీ సాయం అందించాలి. పెట్టుబడికి వడ్డీకి డబ్బులు తెచ్చుకునేవారు ఉన్నారు.
– యాట జగన్, జాపాల